नांदेड | (प्रतिनिधी) माधव वाघमारे
नांदेड जिल्ह्यात मोटारसायकल चोरीच्या घटनांवर आळा घालण्यासाठी पोलिस अधीक्षक श्री. अविनाश कुमार यांच्या आदेशानुसार राबविण्यात आलेल्या विशेष कारवाईत स्थानिक गुन्हे शाखा, नांदेड यांनी मोठे यश मिळवले आहे. मोटारसायकल चोरी करणाऱ्या आंतरराज्य टोळीचा पर्दाफाश करत तीन आरोपींना अटक करण्यात आली असून त्यांच्याकडून एकूण ३० मोटारसायकली जप्त करण्यात आल्या आहेत. या कारवाईत ११ लाख ०८ हजार रुपये किमतीचा मुद्देमाल हस्तगत करण्यात आला आहे.
पोलिसांनी दिलेल्या माहितीनुसार, जिल्ह्यातील विविध पोलीस ठाण्यांत दाखल असलेल्या मोटारसायकल चोरीच्या गुन्ह्यांचा समांतर तपास सुरू असताना दि. २३ डिसेंबर २०२५ रोजी गुप्त बातमीदारामार्फत माहिती मिळाली. त्या आधारे स्थानिक गुन्हे शाखेच्या पथकाने किव्हट व माहूर परिसरात सापळा रचून संशयितांवर कारवाई केली. चौकशीत आरोपींनी नांदेड जिल्ह्यासह इतर ठिकाणांहून दुचाकी चोरी करून त्या तेलंगणा राज्यातील हैदराबाद येथे विक्री केल्याची कबुली दिली.
अटक करण्यात आलेल्या आरोपींची नावे पुढीलप्रमाणे—
- शेख सलमान उर्फ सल्ला शेख मेहबूब (वय २७),
- शेख अल्ताफ उर्फ कालू शेख अशरफ (वय १९),
- शेख सोहेल शेख शौकत उर्फ गांजा (वय २४),
(सर्व रा. चिखली बु. ता. किव्हट, जि. नांदेड)
या टोळीविरुद्ध किव्हट, मुदखेड, हिमायतनगर, मांजरी, माहूर, सिंदखेड, वजीराबाद, शिवाजीनगर, बिलोली जि. यवतमाळ, अहमदपूर जि. लातूर, परभा जि. यवतमाळ आदी पोलीस ठाण्यांत कलम ३०३(२) बीएनएस व ३७९ आयपीसी अन्वये दाखल गुन्ह्यांमध्ये सहभाग असल्याचे उघड झाले आहे. जप्त केलेल्या ३० दुचाक्यांपैकी १९ दुचाकींबाबत चोरीचे गुन्हे निष्पन्न झाले असून उर्वरित बाबत तपास सुरू आहे.
ही कारवाई पोलीस अधीक्षक श्री. अबिनाश कुमार, अपर पोलीस अधीक्षक श्रीमती अर्चना पाटील (भोकर) व अपर पोलीस अधीक्षक श्री. सुरज गुरव यांच्या मार्गदर्शनाखाली, पोलीस निरीक्षक (स्था. गु. शा.) श्री. उदय खंडेराय यांच्या नेतृत्वाखाली पार पडली. तपास पथकातील अधिकारी व अंमलदारांच्या सतर्कतेमुळे मोठ्या प्रमाणावर चोरीच्या गुन्ह्यांचा छडा लागला आहे.
नांदेड पोलिसांच्या या यशस्वी कारवाईमुळे जिल्ह्यातील दुचाकी चोरीच्या घटनांवर मोठा आळा बसणार असून नागरिकांमध्ये समाधान व्यक्त होत आहे.
