नांदेड | २६ डिसेंबर (प्रतिनिधी) माधव वाघमारे
गोदावरी नदी पात्रातील अवैध वाळू उपसा व बेकायदेशीर वाहतुकीविरोधात नांदेड ग्रामीण पोलिसांनी मोठी कारवाई करत वाळू माफियांचे मनसुबे उधळून लावले आहेत. २६ डिसेंबर २०२५ रोजी रात्रीच्या सुमारास करण्यात आलेल्या या कारवाईत पोलिसांनी एकूण ३ लाख ५ हजार रुपयांचा मुद्देमाल जप्त केला असून संबंधितांवर गुन्हा दाखल करण्यात आला आहे.
पोलिसांना मिळालेल्या गोपनीय माहितीनुसार एमएच २६ क्रमांकाचा ट्रॅक्टर वाळूची अवैध वाहतूक करत असल्याचे समजले. त्यानुसार नांदेड ग्रामीण पोलिसांनी एमएच २६ बार अँड रेस्टॉरंटसमोर सापळा रचून रात्री १३.३० वाजता कारवाई केली. तपासादरम्यान टाटा कंपनीचा ४०७ मॉडेलचा टेम्पो (क्रमांक MH 31 CB 3524) अवैधरित्या वाळू वाहतूक करताना आढळून आला.
या प्रकरणात राहुल नागर बाभळगाव, ता. जि. नांदेड (वय ३०, व्यवसाय चालक) व पिंटू डोंगरे रा बाभुळगाव (मालक) अशी आरोपींची नावे असून, त्यांच्याविरुद्ध भा.दं.वि. कलम ३०३(२), ३(५) तसेच महाराष्ट्र जमीन महसूल अधिनियम कलम ४८(७), ४८(८) अन्वये गुन्हा दाखल करण्यात आला आहे.
पोलिसांनी कारवाईदरम्यान टेम्पो वाहन (किंमत अंदाजे ३,००,००० रुपये) आणि एक ब्रास वाळू (किंमत अंदाजे ५,००० रुपये) असा एकूण ३,०५,००० रुपयांचा मुद्देमाल जप्त केला आहे. आरोपींकडून वाळू वाहतुकीचा कोणताही वैध परवाना सादर करण्यात आलेला नव्हता.
ही कारवाई पोलीस अधीक्षक नांदेड यांच्या मार्गदर्शनाखाली, अप्पर पोलीस अधीक्षक (भोकर) व उपविभागीय पोलीस अधिकारी, इतरवारा यांच्या नेतृत्वाखाली नांदेड ग्रामीण पोलीस ठाण्याचे मा . श्री ओमकांत चिंचोलकर यांचा पथकाने यशस्वीपणे पार पाडली. संबंधित अधिकारी व अंमलदारांच्या तत्परतेमुळे अवैध वाळू वाहतुकीला आळा बसण्यास मदत होणार आहे.
अवैध वाळू उपसा व वाहतुकीविरोधात अशाच कठोर कारवाया पुढेही सुरू राहणार असल्याचा इशारा पोलिसांनी दिला असून, पर्यावरणाचे नुकसान करणाऱ्या व कायदा मोडणाऱ्यांविरुद्ध शून्य सहनशीलता धोरण राबविण्यात येणार असल्याचे स्पष्ट करण्यात आले आहे.
