नांदेड, दि. २७ डिसेंबर (प्रतिनिधी) माधव वाघमारे
नांदेड जिल्ह्यात अवैध वाळू उत्खननाविरोधात महसूल प्रशासनाने पुन्हा एकदा कठोर भूमिका घेत कारवाई केली आहे. जिल्हाधिकारी राहुल कर्डिले यांच्या मार्गदर्शनाखाली आज सकाळी त्रिकुट परिसरात राबविण्यात आलेल्या विशेष मोहिमेत सुमारे ३५ लाख रुपये किमतीचा अवैध वाळू उत्खननाचा मुद्देमाल नष्ट करण्यात आला, त्यामुळे वाळू माफियांमध्ये खळबळ उडाली आहे.
उपविभागीय अधिकारी डॉ. सचिन खल्लाळ व तहसीलदार संजय वारकड यांच्या आदेशानुसार नायब तहसीलदार स्वप्निल दिगलवार यांच्या नेतृत्वाखाली महसूल पथकाने पहाटे ६ वाजता त्रिकुट परिसरात गस्त घातली. त्रिकुट संगमाजवळ अवैधरित्या रेती उत्खनन सुरू असल्याची माहिती मिळताच पथकाने तत्काळ कारवाई केली.
या कारवाईदरम्यान ३ मोठ्या बोटी व १ लहान बोट अवैध वाळू उत्खननासाठी वापरात असल्याचे आढळून आले. पथकाने मजुरांच्या मदतीने २ मोठ्या बोटी पाण्यात बुडवून टाकल्या, तर १ मोठी बोट व १ लहान बोट जिलेटीनच्या साहाय्याने स्फोट करून नष्ट करण्यात आली. या कारवाईत एकूण ३५ लाख रुपयांचा मुद्देमाल नष्ट करण्यात आला.
या धडक कारवाईत मंडळ अधिकारी संतोष अस्कुलकर, अनिरुद्ध जोंधळे, मोहसीन सय्यद, प्रमोद बडवने, तसेच ग्राम महसूल अधिकारी माधव भिसे, गौतम पांढरे, एम.के. पाटील, मनोज जाधव, मनोज सरपे, दिलीप पवार, आढाव, मोहन कदम, सचिन उपरे, रमेश गिरी, माधव शिराळे आणि महसूल सेवक शिवा तेलंगे यांचा सहभाग होता.
दरम्यान, अवैध वाळू उत्खनन कोणत्याही परिस्थितीत खपवून घेतले जाणार नाही असा स्पष्ट इशारा उपविभागीय अधिकारी डॉ. सचिन खल्लाळ व तहसीलदार संजय वारकड यांनी दिला आहे. महसूल प्रशासनाची ही कारवाई पुढेही अधिक तीव्र स्वरूपात सुरू राहणार असल्याचे त्यांनी सांगितले.
या कारवाईमुळे अवैध वाळू व्यवसाय करणाऱ्यांचे धाबे दणाणले असून, प्रशासनाच्या कठोर भूमिकेचे नागरिकांकडून स्वागत करण्यात येत आहे.
