नांदेड |२८ डिसेंबर (प्रतिनिधी) माधव वाघमारे
नांदेड ग्रामीण पोलीस ठाणे हद्दीत अवैध जुगार अड्ड्यावर धडक कारवाई करत गुन्हे शोध पथकाने २ लाख ६५ हजार ५०० रुपयांचा मुद्देमाल जप्त केला आहे. ही कारवाई दिनांक २७ डिसेंबर २०२५ रोजी सायंकाळी ५.२५ वाजण्याच्या सुमारास पंकज नगर धनेगाव, नांदेड येथे करण्यात आली.
नांदेडचे पोलीस अधीक्षक मा. श्री. अबिनाश कुमार यांच्या मार्गदर्शनाखाली अवैध धंद्यांवर कारवाई करण्याच्या सूचना दिल्या होत्या. त्यानुसार पोलीस निरीक्षक ओंमकांत चिचोलकर यांच्या नेतृत्वाखाली गुन्हे शोध पथकाने गोपनीय माहितीच्या आधारे पंकज नगर धनेगाव येथे छापा टाकला. छाप्यात काही इसम जुगार खेळताना आढळून आले.
या कारवाईत आरोपींकडून रोख रक्कम १६ हजार ५०० रुपये, ५ मोबाईल फोन, २ मोटारसायकल तसेच जुगार साहित्य असा एकूण २,६५,५०० रुपयांचा मुद्देमाल जप्त करण्यात आला आहे. याप्रकरणी नांदेड ग्रामीण पोलीस ठाण्यात गुन्हा क्रमांक १२३४/२०२५ अन्वये महाराष्ट्र जुगार प्रतिबंधक अधिनियम १९८७ मधील कलम १२(अ) अंतर्गत गुन्हा दाखल करण्यात आला आहे.
या प्रकरणात बालाजी शेखराव भांगरे (वय २९), राहुल शंकर हैबते (वय ३४), शेख अब्दुल बशीर (वय ३१), विशाल राजू भोकरे (वय २६), मयूर संतोष शिंदे (वय २०) व लिंगू सुभाष पवार (वय ३६) अशा सहा आरोपींना अटक करण्यात आली आहे.
सदर कारवाईत पोलीस उपनिरीक्षक ज्ञानेश्वर मठवाड,सहाय्यक पोलीस निरीक्षक अर्जुन मुंडे, हेडकॉन्स्टेबल सत्तार शेख व गुन्हे शोध पथकातील अंमलदारांनी सहभाग घेतला. अवैध जुगार व इतर बेकायदेशीर धंद्यांविरोधात कारवाई पुढेही सुरू राहणार असल्याचे पोलीस प्रशासनाने स्पष्ट केले आहे.
