नांदेड 12 मार्च (प्रतिनिधी माधव वाघमारे)
नांदेड ग्रामीण पोलीस ठाणे आणि स्थानिक गुन्हे शाखेच्या (LCB) संयुक्त पथकाने एका जबरी चोरीच्या गंभीर गुन्ह्याचा छडा लावला आहे. गंगाबेट शिवारात वृद्ध दांपत्याला मारहाण करून दागिने लुटणाऱ्या दोन अट्टल आरोपींना पोलिसांनी अटक केली असून, त्यांच्याकडून १ लाख १० हजार रुपये किमतीचे चांदीचे दागिने हस्तगत करण्यात आले आहेत.
नेमकी घटना काय?
४ मार्च २०२६ रोजी पहाटे २:०० वाजेच्या सुमारास गंगाबेट (ता. जि. नांदेड) येथील शेतातील आखाड्यावर ही घटना घडली होती. फिर्यादी द्रोपदाबाई माणिकराव इनकर (वय ६० वर्षे) आणि त्यांचे पती माणिका नागोबा इनकर (वय ९० वर्षे) झोपलेले असताना, दोन अनोळखी इसमांनी तोंडाला कापड बांधून प्रवेश केला. आरोपींनी वृद्ध दांपत्याला काठीने व दगडाने बेदम मारहाण करून गंभीर जखमी केले आणि त्यांच्या अंगावरील चांदीचे तोडे व पाटल्या असा एकूण १ लाख १० हजार रुपयांचा मुद्देमाल जबरीने लुटून नेला होता.
तपासाची चक्रे फिरली आणि आरोपी गळाला
या घटनेचे गांभीर्य ओळखून पोलीस अधीक्षक अविनाश कुमार यांनी स्वतः घटनास्थळी भेट देऊन तपासाच्या सूचना दिल्या होत्या. स्थानिक गुन्हे शाखा आणि नांदेड ग्रामीण पोलिसांच्या शोध पथकाने गोपनीय माहिती आणि सायबर सेलच्या मदतीने तांत्रिक विश्लेषण केले. तपासादरम्यान जालना जिल्ह्यातील विरेगाव येथील संशयित आरोपींची माहिती मिळाली.
पोलिसांनी सापळा रचून खालील दोन आरोपींना ताब्यात घेतले:
१) रवि ऊर्फ मुंडल भास्कर शिंदे (वय २० वर्षे, रा. विरेगाव, जि. जालना)
२) भास्कर सायबा शिंदे (वय ५५ वर्षे, रा. विरेगाव, जि. जालना)
मुद्देमाल हस्तगत
आरोपींची सखोल चौकशी केली असता, त्यांनी गुन्ह्याची कबुली दिली. त्यांच्याकडून लुटलेले दागिने पोलिसांनी जप्त केले आहेत, ज्यात:
- ५० तोळे वजनाचे चांदीचे जुने तोडे (किंमत ६०,०००/- रुपये)
- ४० तोळे वजनाच्या चांदीच्या जुन्या पाटल्या (किंमत ५०,०००/- रुपये)
एकूण किंमत: १,१०,०००/- रुपये
यांनी केली यशस्वी कारवाई
ही कारवाई पोलीस अधीक्षक अबिनाश कुमार, अपर पोलीस अधीक्षक श्रीमती अर्चना पाटील (भोकर), अपर पोलीस अधीक्षक सूरज गुरव, आणि उपविभागीय पोलीस अधिकारी प्रशांत शिंदे यांच्या मार्गदर्शनाखाली करण्यात आली.
या पथकात पोलीस निरीक्षक ओमकांत चिंचोलकर, स्थानिक गुन्हे शाखेचे उदय खंडेराय, सपोनि विजयकुमार कांबळे, व्यंकट कुसमे आणि इतर अंमलदारांचा समावेश होता. या यशस्वी कामगिरीबद्दल पोलीस अधीक्षकांनी संपूर्ण पथकाचे कौतुक व अभिनंदन केले आहे.
पुढील तपास: या गुन्ह्यात आणखी कोणाचा सहभाग आहे का, याचा अधिक तपास सपोनि विजयकुमार कांबळे करत आहेत.
