नांदेड १८ मार्च (प्रतिनिधी माधव वाघमारे)
शहरातील वाढती वाहतूक कोंडी आणि नियमबाह्य चालणाऱ्या वाहनांमुळे सर्वसामान्यांना होणारा त्रास लक्षात घेता, नांदेड पोलीस प्रशासनाने कडक पावले उचलण्यास सुरुवात केली आहे. पोलीस अधीक्षक मा. श्री. अबिनाश कुमार यांच्या आदेशानुसार शहर वाहतूक शाखा वजीराबादने मंगळवारी मोठी कारवाई केली असून, एकाच दिवशी २३३ वाहनांवर गुन्हे दाखल करत २,३१,६०० रुपयांचा दंड वसूल केला आहे.
नेमकी कारवाई काय?
शहरात विनापरवाना चालणारी वाहने, अवैध प्रवासी वाहतूक, भरधाव वेगाने धावणारी वाहने आणि ‘फटाका’ आवाज काढणाऱ्या बुलेटस्वारांमुळे नागरिकांच्या तक्रारी वाढल्या होत्या. या पार्श्वभूमीवर १७ मार्च २०२६ रोजी सहाय्यक पोलीस निरीक्षक श्री. भागवत नागरगोजे व त्यांच्या पथकाने रेल्वे स्टेशन रोड, वजीराबाद चौक, कलामंदिर, वर्कशॉप, राजकॉर्नर आणि छत्रपती चौक या प्रमुख ठिकाणी नाकाबंदी करून कागदपत्रांची कसून तपासणी केली.
या मोहिमेदरम्यान खालील बाबींवर प्रामुख्याने कारवाई करण्यात आली:
- विना परवाना/परमिट चालणारी वाहने.
- ट्रिपल सीट प्रवास करणारे दुचाकीस्वार.
- गणवेश परिधान न करणारे ऑटो चालक.
- वाहतुकीस अडथळा निर्माण करणारी वाहने.
पोलीस प्रशासनाचे नागरिकांना आवाहन
वाहतूक नियमांचे पालन न करणाऱ्यांवर यापुढेही कडक कारवाई करण्याचे संकेत पोलीस प्रशासनाने दिले आहेत. शहरातील वाढती ट्रॅफिक पाहता नागरिकांनी आपली वाहने रस्त्यावर कुठेही पार्क न करता अधिकृत पार्किंगच्या ठिकाणीच लावावीत. तसेच, रस्त्यावर फळगाडे लावून अतिक्रमण करू नये आणि सिग्नलचे काटेकोर पालन करावे, असे आवाहन करण्यात आले आहे. नियमांचे उल्लंघन करणाऱ्यांवर मोटार वाहन कायद्यांतर्गत कठोर कारवाई केली जाईल, असा इशाराही देण्यात आला आहे.
ही यशस्वी कारवाई पोलीस अधीक्षक मा. श्री. अबिनाश कुमार, अपर पोलीस अधीक्षक मा. श्री. सुरज गुरव यांच्या मार्गदर्शनाखाली शहर वाहतूक शाखा वजीराबादच्या अधिकारी व अंमलदारांनी पार पडली
