नांदेड: १९ मार्च प्रतिनिधी माधव वाघमारे
नांदेड जिल्ह्यातील गुन्हेगारीचे समूळ उच्चाटन करण्यासाठी पोलीस अधीक्षक अबिनाश कुमार यांनी राबविलेल्या ‘ऑपरेशन फ्लश आऊट’ अंतर्गत स्थानिक गुन्हे शाखेने मोठी कामगिरी केली आहे. बिलोली परिसरातून ‘डी गँग’शी संबंधित असलेल्या एका सराईत गुंडाला ताब्यात घेऊन त्याच्याकडून दोन गावठी पिस्तूल, तीन मॅगझिन आणि १० जिवंत काडतुसे असा एकूण ५९ हजार रुपयांचा मुद्देमाल जप्त करण्यात आला आहे.
गोपनीय माहितीवरून लावला सापळा
नांदेड जिल्ह्यात अवैध शस्त्रसाठा बाळगणाऱ्यांविरुद्ध कडक कारवाई करण्याचे आदेश पोलीस अधीक्षक अबिनाश कुमार यांनी दिले होते. या मोहिमेदरम्यान, स्थानिक गुन्हे शाखेचे सहाय्यक पोलीस निरीक्षक विठ्ठल घोगरे यांना गोपनीय बातमीदाराकडून माहिती मिळाली की, चिंचाळा फाटा बसस्थानक परिसरात एक संशयित व्यक्ती अवैध शस्त्रे घेऊन उभी आहे.
मिळालेल्या माहितीची खातरजमा करून पोलिसांनी तात्काळ चिंचाळा फाटा येथे छापा टाकला. यावेळी संशयास्पदरित्या वावरणाऱ्या रवी उर्फ रवीलाला नारायणसिंह ठाकूर (वय ३८ वर्षे, रा. गाडीपुरा इतवारा, नांदेड) याला ताब्यात घेण्यात आले.
५९ हजारांचा मुद्देमाल हस्तगत
पोलिसांनी पंचांसमक्ष आरोपीची अंगझडती घेतली असता, त्याच्याकडे खालील मुद्देमाल आढळून आला:
- दोन लोखंडी बनावटीचे गावठी पिस्तूल (किंमत ५०,०००/-)
- १० जिवंत काडतुसे (किंमत ३,०००/-)
- ०३ मॅगझिन (किंमत ६,०००/-)
असा एकूण ५९,००० रुपयांचा मुद्देमाल जप्त करण्यात आला असून, आरोपीला मुद्देमालासह पुढील कारवाईसाठी बिलोली पोलीस ठाण्याच्या ताब्यात देण्यात आले आहे. या आरोपीचे ‘डी गँग’शी संबंध असल्याचे प्रेस नोटमध्ये नमूद करण्यात आले आहे.
कार्यवाही करणारे पथक
ही यशस्वी कामगिरी पोलीस अधीक्षक अबिनाश कुमार, अपर पोलीस अधीक्षक अर्चना पाटील (भोकर), अपर पोलीस अधीक्षक सुरज गुरव यांच्या मार्गदर्शनाखाली स्थानिक गुन्हे शाखेचे पोलीस निरीक्षक उदय खंडेराय, सपोनि विठ्ठल घोगरे, पो.कॉ. बडगु व खंडणी विरोधी पथकातील अंमलदार बोधगिरे, वैद्य, राठोड, कदम आणि सायबर सेलचे सिटीकर, ओढणे व पठाण यांनी केली आहे.
नांदेड पोलीस दलाच्या या धडाकेबाज कामगिरीचे सर्वत्र कौतुक होत आहे.
