मुक्राबाद (प्रतिनिधी: माधव वाघमारे): नांदेड जिल्ह्याचे पोलीस अधीक्षक श्री. अबिनाश कुमार यांनी अवैध धंद्यांविरुद्ध पुकारलेल्या मोहिमेला मोठे यश आले आहे. मुक्राबाद पोलिसांनी मिळालेल्या गोपनीय माहितीच्या आधारे लखमापूर फाट्याजवळ झाडाखाली सुरू असलेल्या तिरट जुगार अड्ड्यावर छापा टाकून २२ लाख ४२ हजार १९० रुपयांचा मुद्देमाल जप्त केला आहे.
नेमकी घटना काय?
दिनांक २० मार्च २०२६ रोजी सायंकाळी ४:०० वाजेच्या सुमारास मुक्राबाद पोलिसांना गोपनीय बातमीदारामार्फत माहिती मिळाली की, मौजे लखमापूर फाट्याजवळ रोडच्या कडेला काही इसम ‘झन्ना-मन्ना’ नावाचा तिरट जुगार खेळत आणि खेळवत आहेत. या माहितीची खातरजमा करून पोलीस पथकाने तात्काळ घटनास्थळी धाड टाकली. पोलिसांना पाहताच काही इसम पळून जाण्यात यशस्वी झाले, मात्र पोलिसांनी चार आरोपींना जागीच पकडले.
जप्त केलेला मुद्देमाल:
या कारवाईत पोलिसांनी केवळ रोकडच नाही, तर मोठ्या प्रमाणात वाहने आणि साहित्य जप्त केले आहे:
- वाहने: तीन स्विफ्ट डिझायर कार आणि एक युनिकॉन मोटार सायकल.
- साहित्य: चार मोबाईल संच आणि जुगाराचे साहित्य.
- रोख रक्कम: ९,४४० रुपये नगद.
एकूण जप्त मुद्देमाल: २२,४२,१९० रुपये.
अटक केलेले आरोपी:
१. ज्ञानेश्वर एकनाथ बनवरे (वय ३२, रा. ईटग्याळ, ता. मुखेड)
२. मारोती पंढरीनाथ होळगीर (वय २५, रा. मुक्राबाद, ता. मुखेड)
३. विश्वनाथ माधव वंडगीर (वय २२, रा. मुक्राबाद, ता. मुखेड)
४. राहुल किशनराव भोसले (वय ३२, रा. मुक्राबाद, ता. मुखेड)
पोलीस पथकाची कामगिरी:
ही कारवाई पोलीस अधीक्षक अबिनाश कुमार, अपर पोलीस अधीक्षक सुरज गुरव, आणि उपविभागीय पोलीस अधिकारी संकेत गोसावी यांच्या मार्गदर्शनाखाली पार पडली. कारवाईत स.पो.नि. राजू चव्हाण, पो.उ.नि. शंकर मोरे, पोलीस अंमलदार दिलीप तग्याळकर, संदिप देवकत्ते, गजानन ढगे, माधव मलगीरवार आणि दत्तात्रय गंगावारे यांनी सहभाग घेतला. या प्रकरणाचा पुढील तपास स.पो.उ.नि. शिवाजी धोंडीबा आडेकर करत आहेत.
या यशस्वी कामगिरीबद्दल पोलीस अधीक्षक अबिनाश कुमार यांनी मुक्राबाद पोलीस पथकाचे विशेष कौतुक व अभिनंदन केले आहे.
