जुगार आणि मटका अड्ड्यावर पोलिसांचा मोठा छापा १३ आरोपी जेरबंद दीड लाखांचा मुद्देमाल जप्त

परभणी २४ मार्च (प्रतिनिधी माधव वाघमारे)
पाथरी शहरातील अवैध धंद्यांविरुद्ध पोलीस प्रशासनाने कंबर कसली असून, पोलीस उपमहानिरीक्षक यांच्या पथकाने दोन वेगवेगळ्या ठिकाणी छापे टाकून मोठी कारवाई केली आहे. या कारवाईत तिरट नावाचा जुगार आणि ‘फन टार्गेट चकरी’ या ऑनलाईन जुगाराचा पर्दाफाश करण्यात आला असून, एकूण १३ आरोपींना ताब्यात घेण्यात आले आहे. त्यांच्याकडून रोख रक्कम आणि मोबाईल असा एकूण १ लाख ४९ हजार ८०० रुपयांचा मुद्देमाल जप्त करण्यात आला आहे.
पहिली कारवाई: रशिद कॉलनी परिसरात तिरट जुगारावर छापा
पोलीस उपमहानिरीक्षक श्री. शहाजी उमाप यांना पाथरी येथे जुगार अड्डा सुरू असल्याची खात्रीशीर माहिती मिळाली होती. त्यावरून त्यांनी पोलीस अधिकारी व अंमलदारांचे एक पथक पाथरी येथे रवाना केले. २३ मार्च रोजी या पथकाने रशिद कॉलनी परिसरातील एका शेडमध्ये छापा टाकला. तिथे ‘तिरट’ नावाचा जुगार खेळणाऱ्या ८ इसमांना ताब्यात घेण्यात आले. त्यांच्याकडून ३३,२०० रुपयांची रोख रक्कम आणि ७ मोबाईल असा एकूण ८३,२०० रुपयांचा मुद्देमाल जप्त केला. याप्रकरणी पाथरी पोलीस ठाण्यात गुन्हा रजि. नं. १४८/२०२६ नुसार महाराष्ट्र जुगार कायद्यान्वये गुन्हा दाखल करण्यात आला आहे.
दुसरी कारवाई: नायब हॉटेल शेजारील ऑनलाईन जुगारावर कारवाई
दुसऱ्या एका कारवाईत पाथरी शहरातील नायब हॉटेलच्या बाजूला असलेल्या एका शेडमध्ये ‘फन टार्गेट चकरी’ (बिंगो) नावाचा ऑनलाईन जुगार सुरू असल्याचे समोर आले. पोलिसांनी या ठिकाणी छापा टाकून ५ आरोपींना रंगेहाथ पकडले. त्यांच्याकडून ३६,६०० रुपयांची रोकड, १ मोबाईल, संगणक व इतर साहित्य असा एकूण ६६,६०० रुपयांचा मुद्देमाल जप्त करण्यात आला. याप्रकरणी पाथरी पोलीस ठाण्यात गुन्हा रजि. नं. १४९/२०२६ नुसार गुन्हा दाखल करण्यात आला आहे.
दीड लाखांचा मुद्देमाल जप्त
या दोन्ही कारवायांमध्ये पोलिसांनी एकूण ६९,८०० रुपयांची रोख रक्कम, ८ मोबाईल, संगणक व इतर साहित्य असा एकूण १ लाख ४९ हजार ८०० रुपयांचा मुद्देमाल हस्तगत केला आहे. ही कारवाई पोलीस उपनिरीक्षक पंकज इंगळे, पोहेकॉ प्रदीप खानसोळे, संजीव जिंतकलवाड, पोकॉ गणेश धुमाळ व कामाजी गवळी यांच्या पथकाने केली. या कामगिरीबद्दल पोलीस उपमहानिरीक्षक श्री. शहाजी उमाप यांनी पथकाचे अभिनंदन केले आहे.
‘खबर’ हेल्पलाईनचा वापर करण्याचे आवाहन
अवैध व्यवसायांची माहिती पोलिसांपर्यंत पोहोचवण्यासाठी पोलीस उपमहानिरीक्षक कार्यालयाने ९१ ५० १०० १०० हा मोबाईल क्रमांक असलेली ‘खबर’ हेल्पलाईन सुरू केली आहे. नागरिकांनी आपल्या भागातील अवैध धंद्यांची माहिती या क्रमांकावर फोन किंवा व्हॉट्सॲपद्वारे देऊन पोलिसांना सहकार्य करावे, असे आवाहन शहाजी उमाप यांनी केले आहे.