नांदेड १२ एप्रिल प्रतिनिधी

आगामी सण-उत्सव आणि कायदा व सुव्यवस्थेच्या पार्श्वभूमीवर, नांदेड परिक्षेत्राचे पोलीस उपमहानिरीक्षक श्री. शहाजी उमाप यांनी परिक्षेत्रात अवैध धंद्यांविरुद्ध कडक पावले उचलली आहेत. ११ एप्रिल ते २५ एप्रिल २०२६ या कालावधीत गुटखा, अंमली पदार्थ आणि घातक शस्त्रांविरुद्ध विशेष मोहीम राबविण्याचा निर्णय घेण्यात आला असून, मोहिमेच्या पहिल्याच दिवशी मोठी कारवाई करण्यात आली आहे.

गुटखा आणि अंमली पदार्थांवर घाला

या मोहिमेअंतर्गत परिक्षेत्रातील सर्व जिल्ह्यांमध्ये अवैध गुटखा विक्री करणाऱ्यांविरुद्ध ‘भारतीय न्याय संहिता’ कलम १२३ अन्वये गुन्हे दाखल करण्यात आले आहेत. पहिल्या दिवशी एकूण २ गुन्हे नोंदवण्यात आले असून, यामध्ये १ लाख १७ हजार ६४२ रुपये किमतीचा गुटखा व इतर मुद्देमाल जप्त करण्यात आला आहे. या प्रकरणी २ आरोपींना पोलिसांनी बेड्या ठोकल्या आहेत.

शस्त्रसाठ्यावर कारवाई: तलवारी आणि खंजर जप्त

दुसरीकडे, विनापरवाना घातक शस्त्रे बाळगणाऱ्यांविरुद्धही पोलिसांनी धडक कारवाई सुरू केली आहे. शस्त्र अधिनियमांतर्गत एकूण ११ गुन्हे दाखल करून ५७ हजार ८२२ रुपये किमतीच्या तलवारी आणि खंजर जप्त करण्यात आले आहेत. या कारवाईत एकूण १२ आरोपींना अटक करण्यात आली आहे.

‘खबर’ हेल्पलाइनचे आवाहन

अवैध व्यवसायांची माहिती थेट पोलिसांपर्यंत पोहोचवण्यासाठी पोलीस उपमहानिरीक्षक कार्यालयाने ‘खबर’ नावाची विशेष हेल्पलाइन सुरू केली आहे. नागरिक आपल्या परिसरातील अवैध धंद्यांची माहिती ९१ ५० १०० १०० या मोबाईल क्रमांकावर फोन करून किंवा व्हॉट्सॲप मेसेजद्वारे देऊ शकतात. माहिती देणाऱ्याचे नाव गुप्त ठेवले जाईल, असे आवाहन पोलीस उपमहानिरीक्षक श्री. शहाजी उमाप यांनी केले आहे.
ही मोहीम २५ एप्रिलपर्यंत सुरू राहणार असून, गुन्हेगारांचे धाबे दणाणले आहेत.
वृत्त संकलन
प्रतिनिधी माधव वाघमारे, नांदेड