नांदेड ८ मे प्रतिनिधी
शहरात वाढत्या चोऱ्या आणि शरीराविरुद्धच्या गुन्ह्यांना पायबंद घालण्यासाठी पोलीस अधीक्षक श्री. अबिनाश कुमार यांच्या मार्गदर्शनाखाली ‘ऑपरेशन फ्लश आऊट’ राबवले जात आहे. या विशेष मोहिमेअंतर्गत गेल्या २६ दिवसांत तब्बल १७३ हून अधिक सराईत गुन्हेगारांवर कडक कारवाई करण्यात आली असून, गुन्हेगारी जगतात यामुळे मोठी खळबळ उडाली आहे.
रात्रीच्या वेळी कोम्बिंग ऑपरेशन
दिनांक ७ मे च्या रात्री ११ वाजेपासून ते ८ मे २०२६ च्या पहाटे ३ वाजेपर्यंत नांदेड शहरात विशेष कोम्बिंग ऑपरेशन राबवण्यात आले. या मोहिमेत स्वतः पोलीस अधीक्षक अबिनाश कुमार यांच्यासह अपर पोलीस अधीक्षक भोकर, उपविभागीय पोलीस अधिकारी (इतवारा व देगलूर), स्थानिक गुन्हे शाखेचे पथक आणि विविध पोलीस ठाण्यांचे प्रभारी अधिकारी, अंमलदार अशा मोठ्या फौजफाट्याने सहभाग घेतला.
कारवाईची महत्त्वाची आकडेवारी:
या एका रात्रीच्या मोहिमेत पोलिसांनी केलेल्या कारवाईचा तपशील खालीलप्रमाणे आहे:
- तपासलेले तडीपार गुन्हेगार: ३३
- MPDA मधून सुटलेले गुन्हेगार: २८
- सराईत गुन्हेगार (शरीराविरुद्धचे गुन्हे): ३८
- आर्म्स ॲक्ट अंतर्गत गुन्हे: ०३
- मपोका कलम १२२(ब) नुसार गुन्हे: ०१
भाय्यनगर पोलीस ठाण्याच्या हद्दीत सर्वाधिक कारवाया करण्यात आल्या असून, शस्त्र बाळगल्याप्रकरणी आणि इतर कलमान्वये एकूण ६ आरोपींवर गुन्हे दाखल करण्यात आले आहेत.
तडीपारांवर पोलिसांची करडी नजर
या मोहिमेदरम्यान धक्कादायक बाब समोर आली ती म्हणजे, मपोका कलम ५६/५७ प्रमाणे शहरातून हद्दपार करण्यात आलेले १० इसम शहरातच फिरताना मिळून आले. पोलिसांनी तात्काळ त्यांच्याविरुद्ध मपोका कलम १४२ अन्वये गुन्हे दाखल केले आहेत. एकूण २६ दिवसांच्या या विशेष मोहिमेत आतापर्यंत १२६ आरोपींविरुद्ध कारवाई करून १०२ गुन्हे नोंदवण्यात आले आहेत.
सराईत गुन्हेगारांचे ‘राऊंडिंग अप’ आणि त्यांची सततची तपासणी यापुढेही सुरूच राहणार असल्याचे पोलीस प्रशासनाकडून स्पष्ट करण्यात आले आहे. या धडक कारवाईमुळे सर्वसामान्य नागरिकांमध्ये सुरक्षिततेची भावना निर्माण झाली आहे.
वृत्त संकलन:
प्रतिनिधी, माधव वाघमारे
