नांदेड १० मे (प्रतिनिधी माधव वाघमारे)
नांदेड जिल्ह्यात अवैध शस्त्र बाळगणाऱ्यांविरुद्ध पोलिसांनी कडक मोहीम उघडली असून, ‘ऑपरेशन क्रॅक डाऊन’ अंतर्गत नांदेड ग्रामीण पोलिसांनी एका तरुणाला तलवारीसह रंगेहात पकडले आहे. या कारवाईमुळे परिसरात अवैध हत्यार बाळगणाऱ्यांचे धाबे दणाणले आहेत.

नेमकी घटना काय?

जिल्हा पोलीस अधीक्षक अबिनाश कुमार यांनी जिल्ह्यात अवैध हत्यारे बाळगणाऱ्यांवर कडक कारवाई करण्याचे आदेश सर्व पोलीस ठाण्यांना दिले आहेत. याच आदेशाच्या अनुषंगाने नांदेड ग्रामीण पोलीस ठाण्याचे पोलीस निरीक्षक ओमकांत चिंचोलकर यांच्या मार्गदर्शनाखाली पोलीस पथक ९ मे २०२६ रोजी गस्त घालत होते.
दुपारी ४:०० वाजेच्या सुमारास पोलिसांना गोपनीय माहिती मिळाली की, कुशीनगर, कौठा परिसरात एक तरुण आपल्याजवळ तलवार बाळगून फिरत आहे. या माहितीच्या आधारे पोलिसांनी तातडीने कुशीनगर येथील टाके यांच्या घरासमोर छापा टाकला.

आरोपीला बेड्या आणि मुद्देमाल जप्त

पोलिसांनी घटनास्थळी सापळा रचून पप्पीसिंग सिल्लयुसिंग टाक (वय २२ वर्षे, रा. कुशीनगर, कौठा, नांदेड) याला ताब्यात घेतले. त्याची झडती घेतली असता, त्याने आपल्या शर्टच्या आत पाठीमागून एक लोखंडी तलवार खोचलेली आढळली. पोलिसांनी सदर तलवार जप्त केली असून तिची किंमत साधारण १,००० रुपये असल्याचे सांगण्यात आले आहे.

या पथकाने केली कारवाई

ही यशस्वी कारवाई पोलीस अधीक्षक अबिनाश कुमार, अपर पोलीस अधीक्षक (भोकर) श्रीमती अर्चना पाटील, अपर पोलीस अधीक्षक (नांदेड) सुरज गुरव, आणि उपविभागीय पोलीस अधिकारी (इतवारा) प्रशांत शिंदे यांच्या मार्गदर्शनाखाली करण्यात आली.
या पथकात पोलीस निरीक्षक ओमकांत चिंचोलकर, सहाय्यक पोलीस उपनिरीक्षक ज्ञानेश्वर मठवाड, पोलीस हवालदार अर्जुन मुंडे, शेख असीफ, संतोष पवार, गबेंद्र सिरमलवार आणि शेख फय्याज यांचा समावेश होता.

गुन्हा दाखल

आरोपी पप्पीसिंग टाक याच्याविरुद्ध नांदेड ग्रामीण पोलीस ठाण्यात भारतीय शस्त्र अधिनियम कलम ४/२५ अन्वये गुन्हा दाखल करण्यात आला आहे. पोलीस या प्रकरणाचा अधिक तपास करत आहेत. या कामगिरीबद्दल पोलीस अधीक्षक अविनाश कुमार यांनी संपूर्ण पथकाचे कौतुक केले आहे.