नांदेड १६ जून प्रतिनिधी
नांदेड जिल्ह्यातील गुन्हेगारीला आळा घालण्यासाठी पोलीस अधीक्षक मा.श्री. अबिनाश कुमार यांनी ‘ऑपरेशन फ्लॅश आऊट’ अंतर्गत जिल्ह्यातील मालमत्तेविरुद्धचे गुन्हे उघडकीस आणण्याचे कडक आदेश दिले होते. या मोहिमेला वजिराबाद गुन्हे शोध पथकाला मोठे यश आले असून, गेल्या अडीच महिन्यांपासून फरार असलेला जळजळीत दरोड्याच्या गुन्ह्यातील मुख्य आरोपी अखेर पोलिसांच्या जाळ्यात अडकला आहे.
नेमकी घटना काय होती?
३० मार्च २०२६ रोजी रात्री ८:०० वाजेच्या सुमारास फिर्यादी सोहनलाल मोतीलालजी परमार (वय ४० वर्षे, रा. जालना) यांच्या नांदेड येथील जुना मोंढा भागातील ‘मा. आरबुंडा ट्रेडिंग’ नावाच्या आडत ऑफिसमध्ये तीन अनोळखी इसम घुसले. त्यांनी ऑफिसमध्ये काम करणारे शिवहार पतरावाळे यांना खंजरचा धाक दाखवून जिवे मारण्याची धमकी दिली आणि ऑफिसमधील १०,५०,०००/- (दहा लाख पन्नास हजार) रुपये असलेली रोख रकमेची बॅग जबरदस्तीने चोरून नेली होती. याप्रकरणी १ एप्रिल २०२६ रोजी पोलीस स्टेशन वजिराबाद येथे गुरनं. १३९/२०२६ कलम ३१०(२), ३०९(४), ३(५) भारतीय न्याय संहिता सहकलम ४/२५ शस्त्र अधिनियमानुसार गुन्हा दाखल करण्यात आला होता.
अशी झाली आरोपीला अटक
हा गुन्हा घडल्यापासून आरोपी पोलिसांना गुंगारा देत फरार होते. १५ जून २०२६ च्या रात्री ११:०० ते १६ जून २०२६ च्या पहाटे ३:०० वाजेच्या दरम्यान वजिराबाद पोलीस स्टेशनच्या हद्दीत डी.बी. पथकाचे अधिकारी व अंमलदार कोंबिंग ऑपरेशन राबवत होते. यादरम्यान, या दरोड्यातील अडीच महिन्यांपासून फरार असलेला मुख्य आरोपी किशन ऊर्फ बन्ना पि. राजू कुरील (वय २२ वर्षे, रा. गायत्री मंदिराजवळ, जुना मोंढा, नांदेड) हा गायत्री मंदिराजवळील पुलाजवळ संशयास्पद रितीने थांबल्याची गोपनीय माहिती पोलिसांना मिळाली.
माहिती मिळताच पथकाने वरिष्ठ अधिकाऱ्यांच्या मार्गदर्शनाखाली तात्काळ घटनास्थळी जाऊन पाहणी केली व संशयित आरोपीला ताब्यात घेतले. त्याची कसून चौकशी केली असता, त्याने वजिराबाद पोलीस ठाण्यात नोंद असलेला सदर दरोड्याचा गुन्हा केल्याची कबुली दिली. पोलिसांनी त्याला रीतसर अटक केली असून पुढील तपास पोलीस उपनिरीक्षक सुनिल बुलंगे करत आहेत.
या पथकाने केली कामगिरी
सदर उल्लेखनीय कामगिरी पोलीस अधीक्षक मा.श्री. अबिनाश कुमार, अप्पर पोलीस अधीक्षक मा.श्री. सुरज गुरव, अप्पर पोलीस अधीक्षक (भोकर) मा.श्रीमती अर्चना पाटील, आणि उप विभागीय पोलीस अधिकारी मा.श्री. रामेश्वर व्यंजने यांच्या मार्गदर्शनाखाली वजिराबादचे पोलीस निरीक्षक श्री. अजित कुंभार, पोलीस उपनिरीक्षक श्री. सुनिल बुलंगे आणि पोलीस अंमलदार पोहेकॉ/१२१८ शिवसांब मठपती, पोहेकॉ/२५४३ हबीब चाऊस, पोहेकॉ/२२३६ अजय यादव, पोकॉ/१५४ संतोष पोकळे, पोकॉ/१९३४ संतोष पावडे, पोकॉ/३०८० विलास कदम, पोकॉ/१४ भाऊसाहेब राठोड आणि पोकॉ/४६७ जसविंदरसिंग चिमा यांनी केली आहे.
या धडक कारवाईबद्दल पोलीस अधीक्षक मा.श्री. अबिनाश कुमार यांनी वजिराबाद पोलीस ठाण्याच्या संपूर्ण टीमचे कौतुक केले आहे.
विशेष रिपोर्ट
प्रतिनिधी: माधव वाघमारे, नांदेड
