नांदेड २१ जून प्रतिनिधी
शहरातील वजीराबाद पोलीस ठाण्याच्या हद्दीतील खडकपुरा भागात २१ जून २०२६ रोजी मध्यरात्री घडलेल्या एका खळबळजनक खून प्रकरणाचा छडा लावण्यात नांदेड पोलिसांना अवघ्या ४ तासांत यश आले आहे. स्थानिक गुन्हे शाखा (LCB) आणि वजीराबाद पोलीस ठाण्याच्या पथकाने संयुक्तपणे अतिशय वेगाने चक्रे फिरवून या प्रकरणातील ५ मुख्य आरोपींच्या मुसक्या आवळल्या आहेत.
जुना राग मनात धरून थरारक खून
मिळालेल्या माहितीनुसार, मृत इसम शेख शमीम शेख इसाक (रा. खडकपुरा, नांदेड) हे सन २०२३ मधील एक केस मागे घेण्याच्या कारणावरून, तसेच दर्गा हजरतशहा रहेमान व दुल्लेशहा रहेमान नगर मस्जिदीचे नायब मुतवले म्हणून कामकाज पाहत होते. याच गोष्टीचा तीव्र राग मनात धरून आरोपींनी त्यांच्यावर पिस्तुलने फायर केले. इतकेच नव्हे तर, जवळ असलेल्या तलवार व खंजरने शरीरावर सपासप वार करून त्यांचा निर्घृण खून केला. या प्रकरणी वजीराबाद पोलीस ठाण्यात गु.र.नं. ३०२/२०२६ नुसार भारतीय न्याय संहिता कलम १०३(१), ३(५) सह शस्त्र अधिनियम कलम ३/२५, ७/२५, ४/२७ अन्वये गुन्हा दाखल करण्यात आला होता.
अटक करण्यात आलेले आरोपी:
पोलिसांनी अत्यंत गुप्तपणे व तांत्रिक विश्लेषणाच्या आधारे ज्या ५ आरोपींना ताब्यात घेतले, त्यांची नावे खालीलप्रमाणे आहेत:
१) मिर्झा शब्बीर बेग गफार बेग (वय ३९ वर्षे, रा. खडकपुरा, नांदेड)
२) ऋषीकेश अनिल घुले (वय २३ वर्षे, रा. शंकर नगर, तरोडा खुर्द, नांदेड)
३) सय्यद सुफियान सय्यद जमीर (वय १९ वर्षे, रा. देगलूर नाका, नांदेड)
४) माधव भगवान कांबळे (वय २१ वर्षे, रा. राहुल कॉलनी, तरोडा बु., नांदेड)
५) मुस्ताक अहमद इसाक अहमद (वय २१ वर्षे, रा. आसननगर, नांदेड)
६२ ठिकाणचे CCTV अन् पोलीस जाळे
घटनेचे गांभीर्य ओळखून पोलीस अधीक्षक मा. श्री. अबिनाश कुमार यांनी तात्काळ गुन्हा उघडकीस आणण्याचे आदेश दिले. त्यानुसार वरिष्ठ अधिकाऱ्यांनी तातडीने घटनास्थळाला भेट दिली. आरोपींचा शोध घेण्यासाठी पोलिसांची वेगवेगळी ४ पथके तयार करण्यात आली. या पथकांनी परिसरातील तब्बल ६२ ठिकाणचे CCTV फुटेज बारकाईने तपासले, तसेच संशयास्पद हजारो मोबाईल क्रमांकांचे तांत्रिक विश्लेषण (Technical Analysis) केले.
तपास सुरू असतानाच, सर्व आरोपी हे ओळख लपवून महादेव पिंपळगाव ता. अर्धापूर शिवारात असल्याची खात्रीशीर गोपनीय माहिती पोलिसांना मिळाली. वरिष्ठांच्या आदेशाने पोलिसांनी तात्काळ त्या भागात सापळा रचला आणि अवघ्या ४ तासांच्या आत पाचही आरोपींना ताब्यात घेतले. सखोल चौकशीदरम्यान आरोपींनी गुन्ह्याची कबुली दिली असून पुढील कायदेशीर कारवाईसाठी त्यांना वजीराबाद पोलिसांच्या स्वाधीन करण्यात आले आहे.
मार्गदर्शक व कारवाई करणारे अधिकारी:
ही धडक कारवाई पोलीस अधीक्षक मा. श्री. अबिनाश कुमार, अपर पोलीस अधीक्षक (भोकर) मा. श्रीमती अर्चना पाटील, अपर पोलीस अधीक्षक (नांदेड) मा. श्री. सुरज गुरव, आणि उपविभागीय पोलीस अधिकारी (नांदेड शहर) श्री. रामेश्वर व्यंजने यांच्या मार्गदर्शनाखाली करण्यात आली.
तसेच एलसीबीचे पोलीस निरीक्षक श्री. अतुल भोसले, वजीराबादचे पोलीस निरीक्षक श्री. अजीत कुंभार, स.पो.नि. श्री. रवि वाहुळे, श्री. विठ्ठल घोगरे आणि स्थानिक गुन्हे शाखा, सायबर सेल व वजीराबाद पोलीस ठाण्याच्या अंमलदारांच्या पथकाने ही यशस्वी कामगिरी बजावली. अवघ्या ४ तासांत मुख्य आरोपींना जेरबंद केल्याबद्दल पोलीस अधीक्षकांनी सर्व अधिकारी व अंमलदारांचे विशेष कौतुक केले आहे.
वृत्त संकलन
प्रतिनिधी: माधव वाघमारे, नांदेड.
