नांदेड ८ जुलै (प्रतिनिधी)
नांदेडचे पोलीस अधीक्षक श्री. नीलाभ रोहन यांच्या मार्गदर्शनाखाली जिल्ह्यात अवैध धंद्यांविरुद्ध धडक मोहीम सुरू आहे. याच मोहिमेचा भाग म्हणून किनवट उपविभागाचे पोलीस अधिकारी चंद्रशेखर कदम यांच्या विशेष पथकाने रामनगर, किनवट येथे सुरू असलेल्या एका बनावट तंबाखूजन्य पदार्थ तयार करणाऱ्या अड्ड्यावर धाडसी छापा टाकला आहे. या कारवाईत पोलिसांनी ५१,४२० रुपये किमतीचा मुद्देमाल जप्त केला असून ७ आरोपींविरुद्ध गुन्हा दाखल केला आहे.
गोपनीय माहितीच्या आधारे कारवाई
मिळालेल्या माहितीनुसार, दि. ०७ जुलै २०२६ रोजी सकाळी रामनगर, किनवट येथील एका टिन शेडमध्ये विनापरवाना तंबाखू, सुपारी, चुना मिश्रित ‘खरा’ तयार करून त्याची बेकायदेशीर विक्री केली जात असल्याची गोपनीय माहिती डी.वाय.एस.पी. किनवट यांच्या पथकाला मिळाली होती. माहिती मिळताच पथकाने तातडीने सदर ठिकाणी छापा टाकला.
साहित्य व मुद्देमाल जप्त
या छाप्यात बनावट तंबाखूजन्य पदार्थ तयार करण्यासाठी वापरण्यात येणारे मशीन, चुना, सुपारी, तंबाखू, पॅकिंग साहित्य आणि इतर साहित्य असा एकूण ५१,४२०/- रुपये किमतीचा मुद्देमाल पोलिसांनी घटनास्थळावरून जप्त केला आहे. प्राथमिक तपासात हे आरोपी केवळ आर्थिक फायद्यासाठी मानवी आरोग्यास अत्यंत घातक ठरणारे पदार्थ तयार करून विकत असल्याचे निष्पन्न झाले आहे.
७ आरोपींवर गुन्हे दाखल (BNS नुसार कारवाई)
या प्रकरणी किनवट पोलीस ठाण्यात गु.र.नं. १५६/२०२६ अन्वये भारतीय न्याय संहिता (BNS) कलम १२३, २७४, २७५, ३(५) तसेच अन्नसुरक्षा व मानके अधिनियम, २००६ चे कलम ५९ प्रमाणे खालील सात आरोपींवर गुन्हे दाखल करण्यात आले आहेत:
१) गजानन नारायण बैनवाड (रा. रामनगर, किनवट)
२) राहुल किशन नरोटे (रा. शिवाजीनगर, किनवट)
३) श्रीकांत इरबाजी वाघमारे (रा. गोकुंदा)
४) विनायक सुभा देणेवार (रा. रामनगर)
५) नकुल संतोष भंडारे (रा. रामनगर)
६) दिलीप मलया राम शेट्टिवार (रा. रामनगर)
७) शिवा विनोद बेल्सलवार (रा. रामनगर)
या प्रकरणाचा पुढील तपास पोलीस उपनिरीक्षक फडेवार (पोलीस स्टेशन किनवट) हे करत आहेत.
कारवाई करणारे पोलीस पथक
ही यशस्वी कारवाई मा. डॉ. नीलाभ रोहन (पोलीस अधीक्षक, नांदेड) यांच्या मार्गदर्शनाखाली चंद्रशेखर कदम (उप विभागीय पोलीस अधिकारी, किनवट), ग्रेड पोलीस उपनिरीक्षक बाबुराव भरकाडे, सपोउपनि मणिकराम आडे आणि पोकॉ शाम चव्हाण यांच्या पथकाने पार पाडली.
नागरिकांसाठी आवाहन: अवैध धंद्यांची माहिती देण्यासाठी हेल्पलाईन सुरू
मा. डॉ. नीलाभ रोहन यांच्या संकल्पनेतून किनवट उपविभाग शंभर टक्के अवैध धंदेमुक्त करण्यासाठी नागरिकांसाठी ९९७५६७९७३३ (9975679733) हा हेल्पलाईन क्रमांक उपलब्ध करून देण्यात आला आहे. अवैध धंद्यांशी संबंधित कोणतीही माहिती असल्यास नागरिकांनी या क्रमांकावर संपर्क साधावा. माहिती देणाऱ्याचे नाव, पत्ता आणि मोबाईल क्रमांक पूर्णपणे गोपनीय ठेवण्यात येईल, अशी ग्वाही पोलीस प्रशासनाने दिली आहे.
बातमी प्रतिनिधी: माधव वाघमारे
