नांदेडमध्ये इतवारा पोलिसांची मोठी कारवाई अवैध गावठी पिस्तूल बाळगणारा एक आरोपी जेरबंद

नांदेड २४ जुलै ( प्रतिनिधी माधव वाघमारे)
शहर व जिल्ह्यात कायदा-सुव्यवस्था अबाधित राखण्यासाठी पोलीस प्रशासनाकडून विशेष मोहीम राबवली जात आहे. याच पार्श्वभूमीवर नांदेड शहरात राबविण्यात येत असलेल्या विशेष ‘कॉम्बिंग ऑपरेशन’दरम्यान इतवारा पोलीस ठाण्याच्या पथकाने एका तरुणाला अवैध गावठी पिस्तूलासह रंगेहात पकडत बेड्या ठोकल्या आहेत.

काला पूल परिसरात रचला सापळा

नांदेडचे पोलीस अधीक्षक मा. डॉ. नीलाभ रोहन यांच्या आदेशानुसार व मार्गदर्शनाखाली शहरात कॉम्बिंग ऑपरेशन सुरू आहे. २३ जुलै २०२६ रोजी इतवारा पोलीस ठाण्याचे प्रभारी अधिकारी यांच्या नेतृत्वाखाली पोलीस उपनिरीक्षक जळबाजी गायकवाड व त्यांच्या पथकाला गोपनीय बातमीदाराकडून पक्की माहिती मिळाली की, गाडीपुरा ते गौतमनगर जाणाऱ्या रस्त्यावरील ‘काला पूल’ परिसरात एक इसम बेकायदेशीरपणे गावठी पिस्तूल बाळगून फिरत आहे.
माहिती मिळताच पोलिसांनी तात्काळ घटनास्थळी धाव घेत पंचांसमक्ष सापळा रचला आणि संशयित इसमाला ताब्यात घेतले.

३० हजार रुपये किमतीचे पिस्तूल जप्त

पोलीस चौकशीत संशयिताने आपले नाव अयान बेग पी. युसुफ बेग (वय २४ वर्षे, रा. पाकिजा नगर, टायर बोर्ड, देगलूर नाका, जुने पोस्ट ऑफिसजवळ, बेल मार्केट, इतवारा, नांदेड) असे सांगितले. पोलिसांकडून त्याची अंगझडती घेतली असता, त्याच्या कंबरेला खोचलेले सुमारे ३०,००० रुपये किमतीचे एक सिल्व्हर रंगाचे गावठी पिस्तूल (अग्निशस्त्र) आढळून आले. सदर शस्त्राबाबत वैध परवान्याची विचारणा केली असता तो कोणताही परवाना सादर करू शकला नाही. त्यामुळे पोलिसांनी घटनास्थळी पंचनामा करून शस्त्र जप्त केले.

अग्निशस्त्र कायद्यान्वये गुन्हा दाखल

या प्रकरणी आरोपीविरुद्ध पोलीस स्टेशन इतवारा येथे अपराध क्र. २५५/२०२६, कलम ३/२५ भारतीय हत्यार कायद्यान्वये गुन्हा दाखल करण्यात आला आहे. सदर प्रकरणाचा पुढील तपास पोउपनि जळबाजी गायकवाड हे करत आहेत.

पोलीस पथकाची धडक कारवाई

ही धडक कारवाई पोलीस अधीक्षक मा. डॉ. नीलाभ रोहन, अपर पोलीस अधीक्षक श्री. सूरज गुरव यांच्या मार्गदर्शनाखाली पोलीस निरीक्षक रामेश्वर खनाळ, संजय शिंदे यांच्या नेतृत्वात पोलीस उपनिरीक्षक जळबाजी गायकवाड आणि पोलीस अंमलदार बंडू कलंदर, हरप्रितसिंग सुखई, ईसराईल शेख, साहेबराव जगताप, कोरनुळे (सर्व नेमणूक इतवारा पोलीस ठाणे) यांच्या पथकाने यशस्वीरीत्या पार पाडली.

नांदेड पोलिसांचे नागरिकांना आवाहन:
नांदेड पोलीस दलातर्फे नागरिकांना आवाहन करण्यात येते की, कोणत्याही व्यक्तीकडे अवैध शस्त्रे किंवा संशयास्पद हालचाली आढळल्यास नागरिकांनी तात्काळ जवळच्या पोलीस ठाण्यास अथवा पोलीस नियंत्रण कक्षास माहिती द्यावी. माहिती देणाऱ्याचे नाव गुप्त ठेवले जाईल.