निवासी आयुक्त श्वेता सिंघल व नांदेडचे जिल्हाधिकारी राहुल कर्डिले यांच्यासह वरिष्ठ अधिकाऱ्यांची उपस्थिती

प्रतिनिधी: माधव वाघमारे
नवी दिल्ली २३ जुलै प्रतिनिधी
राजधानी दिल्ली येथील महाराष्ट्र सदनात माजी उपमुख्यमंत्र्यांच्या जयंतीनिमित्त विशेष कार्यक्रमाचे आयोजन करण्यात आले होते. याप्रसंगी निवासी आयुक्त तथा सचिव श्वेता सिंघल यांनी त्यांच्या प्रतिमेस पुष्पांजली अर्पण करून विनम्र अभिवादन केले.
कोपर्निकस मार्ग येथील महाराष्ट्र सदनातील मुख्य सभागृहात हा कार्यक्रम अत्यंत भावपूर्ण आणि शिस्तबद्ध वातावरणात पार पडला. या कार्यक्रमास नांदेड जिल्ह्याचे जिल्हाधिकारी राहुल कर्डिले, महाराष्ट्र परिचय केंद्राचे संचालक हेमराज बागुल, सहायक निवासी आयुक्त नितीन शेंडे, सहायक निवासी आयुक्त स्मिता शेलार, जनसंपर्क अधिकारी मनीषा पिंगळे तसेच महाराष्ट्र सदनाचे व्यवस्थापक प्रमोद कोलपते यांच्यासह दिल्लीस्थित इतर वरिष्ठ अधिकारी व कर्मचारी मोठ्या संख्येने उपस्थित होते.
या प्रसंगी उपस्थितांना संबोधित करताना महाराष्ट्र सदनाचे व्यवस्थापक प्रमोद कोलपते यांनी, “राज्याचा सर्वांगीण विकास, प्रशासनाला गती देण्याचे कार्य आणि सार्वजनिक जीवन व लोकसेवेतील त्यांचे अमूल्य योगदान कायम स्मरणात राहील,” अशा शब्दांत त्यांच्या कार्याचा गौरव केला.
कार्यक्रमाच्या शेवटी उपस्थितांनी शांतता राखून आदरांजली वाहिली. महाराष्ट्र सदनातील या अभिवादन कार्यक्रमास विविध विभागांचे कर्मचारी आणि नागरिकांचीही उपस्थिती होती.