नांदेड, दि. 13 नोव्हेंबर – (प्रतिनिधी) माधव वाघमारे
नगर परिषद निवडणूक 2025 च्या पार्श्वभूमीवर नांदेड जिल्ह्यात तपासणी पथकांकडून सक्रीय कारवाई सुरू आहे. या कारवाईदरम्यान आज कुंडलवाडी शहरातील चुंगी नाका येथे स्थिर निरीक्षण पथकाने (SST) 28 लाख 50 हजार रुपयांचा मुद्देमाल जप्त केला आहे.
आज दुपारी 4.00 वाजताच्या सुमारास कुंडलवाडी चुंगी नाका येथे एसएसटी पथकाने तपासणी केली असता, एक Tavera Chevrolet कार (क्र. MH 26 E 4848) संशयास्पदरित्या आढळली. वाहनाची तपासणी केल्यावर गाडीतील चार संशयित व्यक्तींना ताब्यात घेण्यात आले. तपासात त्यांच्या ताब्यातील वाहनातून 21 लाख 50 हजार रुपये रोख, एक लोडेड पॉलीथीन पिशवी, एक पोलो कंपनीची पिशवी, तसेच एक लाकडी बट असलेली MOD.65 बंधूक (एअर गन प्रकारची) असा एकूण 28 लाख 50 हजार रुपयांचा मुद्देमाल सापडला.
तपासात हे सर्व संशयित उमेदवारांना पैसे वाटण्यासाठी घेऊन जात असल्याचा प्राथमिक अंदाज पोलिसांनी वर्तविला आहे. वाहनचालक व तिघे साथीदार हे नांदेड जिल्ह्यातील रहिवासी असल्याचे स्पष्ट झाले आहे.
ही कारवाई पोलीस अधीक्षक श्री. अबिनाश कुमार यांच्या मार्गदर्शनाखाली, अप्पर पोलीस अधीक्षक श्रीमती अर्चना पाटील, उपविभागीय पोलीस अधिकारी श्री. दशरथ पाटील धर्माधिकारी, सहाय्यक पोलीस निरीक्षक गजानन शिंदे, तसेच पोलीस कर्मचाऱ्यांनी संयुक्तरीत्या केली.
जप्त मुद्देमाल पुढील तपासासाठी कुंडलवाडी पोलीस ठाण्यात जमा करण्यात आला आहे.
एकूण जप्त मुद्देमाल:
- ₹21,50,000 रोख रक्कम
- ₹7,00,000 किंमतीची Tavera Chevrolet कार
- ₹50,000 किंमतीच्या लोडेड पॉलीथीन पिशव्या
- ₹10,000 किंमतीची MOD.65 बंदूक (एअर गन प्रकार)
एकूण किंमत: ₹28,50,000
