नांदेड :- १७ डिसेंबर (प्रतिनिधी) माधव वाघमारे गोदावरी नदी पात्रातून अवैधरित्या रेती उपसा व वाहतूक करणाऱ्या रेती माफियांवर नांदेड ग्रामीण चे पोलीस निरीक्षक ओमकांत चिंचोलकर यांची धडक कारवाई करत मोठे यश मिळवले आहे. या कारवाईत तब्बल ४० लाख २० हजार रुपयांचा मुद्देमाल जप्त करण्यात आला असून दोन आरोपींविरुद्ध गुन्हा दाखल करण्यात आला आहे.
दि. १६ डिसेंबर २०२५ रोजी सायंकाळी ६ वाजण्याच्या सुमारास बोडार गावाजवळील रोडवर गोपनीय माहितीच्या आधारे ही कारवाई करण्यात आली. पोलिसांना मिळालेल्या माहितीनुसार एक हायवा टिप्परमधून गोडावरी नदी पात्रातील अवैध रेतीची वाहतूक सुरू होती. नांदेड ग्रामीण पोलीस स्टेशनच्या पथकाने सापळा रचून संबंधित वाहन अडवले.
तपासादरम्यान MH26 BD 4100 क्रमांकाचा हायवा टिप्पर आढळून आला. सदर वाहनात अंदाजे चार ब्रास रेती भरलेली होती. या प्रकरणी हायवा टिप्पर (किंमत अंदाजे ४० लाख रुपये) व रेती (किंमत अंदाजे २० हजार रुपये) असा एकूण ४०,२०,००० रुपयांचा मुद्देमाल जप्त करण्यात आला.
या प्रकरणात माधव निरंजन गिरी (वय ३७, व्यवसाय ड्रायव्हर, रा. लोहा, जि. नांदेड) व मधुकर अरुण दिवे (वय ४०, रा. आनंदनगर, नांदेड) अशी आरोपींची नावे असून त्यांच्याविरुद्ध भारतीय न्याय संहिता कलम ३०३(२), ३(५) तसेच महाराष्ट्र जमीन महसूल अधिनियम कलम ४८(७), ४८(८) अंतर्गत गुन्हा नोंदविण्यात आला आहे.
ही कारवाई माननीय पोलीस अधीक्षक श्री. अबिनाश कुमार यांच्या आदेशानुसार व अप्पर पोलीस अधीक्षक (भोकर) अर्चना पाटील, अप्पर पोलीस अधीक्षक नांदेड सुरज गुरव आणि उपविभागीय पोलीस अधिकारी इतरवारा प्रशांत शिंदे यांच्या मार्गदर्शनाखाली करण्यात आली. नांदेड ग्रामीण पोलीस स्टेशनचे अधिकारी व अंमलदारांनी ही यशस्वी कारवाई केली.
अवैध रेती उपसा व वाहतुकीमुळे पर्यावरणाचे मोठ्या प्रमाणात नुकसान होत असून अशा बेकायदेशीर कृत्यांवर कडक कारवाई सुरूच राहणार असल्याचा इशारा पोलिस प्रशासनाने दिला आहे.
