प्रतिनिधी, माधव वाघमारे
नांदेड, दि. १ मार्च : नांदेड शहरातील सार्वजनिक ठिकाणी दारू पिऊन शांतता भंग करणाऱ्या व्यक्तींवर पोलिसांनी मोठी कारवाई केली आहे. पोलीस अधीक्षक अबिनाश कुमार यांच्या आदेशानुसार सुरू करण्यात आलेल्या ‘सिटी स्ट्रिट सेफ्टी ड्राईव्ह’अंतर्गत ही कारवाई करण्यात आली.
पोलीस अधीक्षक अबिनाश कुमार आणि अपर पोलीस अधीक्षक सुरज गुरव यांच्या मार्गदर्शनाखाली पोलीस निरीक्षक भागवत नागरगोजे यांच्या नेतृत्वात ही मोहीम राबविण्यात आली. दिनांक २८ फेब्रुवारी रोजी शहरातील विविध भागात पथकांनी केलेल्या कारवाईत एकूण ६ जणांवर कलम ११०/११७ महाराष्ट्र पोलीस कायद्यांतर्गत कारवाई करण्यात आली.
ठिकठिकाणी कारवाईचा आढावा
· एमआयडीसी (नांदेड ग्रामीण) : एका इसमास मद्यप्राशन करून शांतता भंग केल्याप्रकरणी पकडण्यात आले.
· सत्कार वाईन शॉप (भाग्यनगर) : येथे दोघांवर कारवाई करण्यात आली.
· विसावा गार्डन (शिवाजीनगर) : येथे एका इसमास तसेच दामिनी पथकाने आरडाओरड करणाऱ्या एका इसमास अटक केली.
· कोर्ट परिसर (विजराबाद) : एका व्यक्तीवर कारवाई.
· नमस्कार चौक (विमानतळ परिसर) : येथेही एका आरोपीवर गुन्हा दाखल करण्यात आला.
याशिवाय पोलिसांनी आपल्या संबंधित हद्दीतील दारूची दुकाने, वाईन शॉप आणि हॉटेल्सचीही तपासणी केली.
पोलीस अधीक्षक अबिनाश कुमार यांनी नागरिकांना आवाहन केले आहे की, कोणीही सार्वजनिक ठिकाणी दारू पिऊन शांतता भंग करू नये. तसेच दारू पिण्यासाठी जागा उपलब्ध करून देऊ नये, अन्यथा संबंधितांवर कडक कारवाई करण्यात येईल, असा इशाराही त्यांनी दिला आहे.
