प्रतिनिधी, माधव वाघमारे
दिल्ली, दि. 12 मार्च: उत्तर रेल्वेच्या दिल्ली विभागातील दिल्ली किशनगंज स्थानकावर यार्ड रिमॉडेलिंगच्या कामामुळे प्रवाशांच्या मार्गात तात्पुरता बदल करण्यात येणार आहे. या कामासाठी 5 मे 2026 ते 13 मे 2026 दरम्यान ब्लॉक घेण्यात येणार असून, या कालावधीत हैदराबादहून निघणाऱ्या तीन सुपरफास्ट गाड्यांचा मार्ग बदलण्यात आला आहे.
रेल्वे प्रशासनाने दिलेल्या माहितीनुसार, या कालावधीत हु.सा.नांदेड येथून श्रीगंगानगर आणि अमृतसरला जाणाऱ्या गाड्या नवी दिल्ली स्थानकावर न थांबता थेट दिल्ली सफदरजंग येथे थांबविण्यात येणार आहेत. बदललेल्या मार्गामध्ये या गाड्या ओखला, लाजपत नगर, पटेल नगर, दया बस्ती आणि शकूरबस्ती मार्गे धावणार आहेत.
या गाड्यांच्या मार्गात बदल:
· गाडी क्रमांक 12485 (हु.सा.नांदेड-श्रीगंगानगर सुपरफास्ट एक्सप्रेस): ही गाडी 4, 7 आणि 11 मे 2026 रोजी बदललेल्या मार्गाने धावेल. या गाडीचा नवी दिल्ली येथील थांबा रद्द करण्यात आला असून, त्याऐवजी दिल्ली सफदरजंग येथे सकाळी 9.50 ते 9.55 या वेळेत थांबा देण्यात येईल.
· गाडी क्रमांक 12421 (हु.सा.नांदेड-अमृतसर सुपरफास्ट एक्सप्रेस): 6 मे 2026 रोजी ही गाडी बदललेल्या मार्गाने धावणार आहे. या गाडीलाही नवी दिल्लीऐवजी दिल्ली सफदरजंग येथे सकाळी 9.50 ते 9.55 या वेळेत थांबा असेल.
· गाडी क्रमांक 12439 (हु.सा.नांदेड-श्रीगंगानगर सुपरफास्ट एक्सप्रेस): 10 मे 2026 रोड ही गाडी सुद्धा बदललेल्या मार्गाने धावेल. या गाडीचाही नवी दिल्लीचा थांबा रद्द करण्यात आला असून, दिल्ली सफदरजंग येथे सकाळी 9.50 ते 9.55 या वेळेत थांबा राहील.
रेल्वे प्रशासनाने प्रवाशांना सूचित केले आहे की या तात्पुरत्या बदलामुळे ज्या प्रवाशांना नवी दिल्ली स्थानकावर उतरायचे किंवा चढायचे आहे, त्यांनी दिल्ली सफदरजंग येथे आपल्या प्रवासाचे नियोजन करावे. या बदलामुळे प्रवाशांना होणाऱ्या गैरसोयीबद्दल रेल्वे प्रशासनाने खेद व्यक्त केला आहे.
