नांदेड |16 मार्च प्रतिनिधी: माधव वाघमारे नांदेड शहरात सार्वजनिक शांततेचा भंग करणाऱ्या आणि उघड्यावर मद्यप्राशन करून गोंधळ घालणाऱ्या समाजकंटकांविरुद्ध पोलीस अधीक्षक अविनाश कुमार यांच्या मार्गदर्शनाखाली ‘सिटी स्ट्रीट सेफ्टी ड्राईव्ह’ अंतर्गत मोठी मोहीम राबवण्यात आली आहे. दि. १४ आणि १५ मार्च रोजी शहराच्या विविध भागात करण्यात आलेल्या या कारवाईमुळे गुन्हेगारांचे धाबे दणाणले आहेत.
पोलीस अधीक्षकांच्या सूचनेनुसार विशेष मोहीम
नांदेड शहरात सार्वजनिक ठिकाणी घडणाऱ्या गुन्ह्यांना आळा घालण्यासाठी पोलीस अधीक्षक अबिनाश कुमार व अपर पोलीस अधीक्षक सुरज गुरव यांच्या सूचनेनुसार ‘सिटी स्ट्रीट सेफ्टी ड्राईव्ह’ पथक कार्यान्वित करण्यात आले आहे. पथक प्रमुख सपोनि भागवत नागरगोजे व ‘चार्ली’ पोलीस अंमलदारांनी शहरात ठिकठिकाणी गस्त घालून ही कारवाई केली.
तीन प्रमुख ठिकाणी झालेली कारवाई:
१) भाग्यनगर परिसर: रबडी चौक येथे पेट्रोलिंग दरम्यान २ इसम मद्यप्राशन करून सार्वजनिक शांततेचा भंग करताना मिळून आले. त्यांच्यावर कलम ११०/११७ म.पो. कायद्यानुसार कारवाई करण्यात आली. तसेच परिसरातील दारूची दुकाने, वाईन शॉप आणि हॉटेलची कसून तपासणी करण्यात आली.
२) विमानतळ परिसर: आसना ब्रिज परिसरात संशयास्पद रित्या वावरणाऱ्या ६ इसमांना ताब्यात घेण्यात आले. त्यांच्याकडे दरोड्याचे साहित्य आणि एक ‘इनोव्हा’ कार मिळून आली. याप्रकरणी विमानतळ पोलीस ठाण्यात कलम ३१०(४)(५) बीएनएस २०२३ नुसार गुन्हा दाखल करण्यात आला आहे.
३) दामिनी पथकाची कारवाई (विसावा गार्डन): दामिनी पथकाद्वारे पेट्रोलिंग सुरू असताना विसावा गार्डन परिसरात ४ इसम आरडाओरड करून शांतता भंग करताना आढळले. त्यांच्यावर शिवाजीनगर पोलीस ठाण्यात कलम ११०/११७ म.पो.का. प्रमाणे कारवाई करण्यात आली.
पोलीस अधीक्षकांचे आवाहन नांदेड शहरात कोणत्याही सार्वजनिक ठिकाणी नागरिकांनी मद्यप्राशन करू नये. तसेच कोणासही दारू पिण्यासाठी जागा उपलब्ध करून देऊ नये. सार्वजनिक शांततेचा भंग करणाऱ्यांवर यापुढेही अशीच कडक कायदेशीर कारवाई केली जाईल.
अबिनाश कुमार, पोलीस अधीक्षक, नांदेड.
