नांदेड पोलीस प्रशासनाची धडक कारवाई ८४ फटाका सायलेन्सर जप्त व नष्ट

नांदेड २४ मार्च (प्रतिनिधी माधव वाघमारे)
नांदेड शहरामध्ये दुचाकी सायलेन्सरमध्ये अनधिकृत बदल करून मोठ्या आवाजात ‘फटाका’ फोडणाऱ्या आणि ध्वनी प्रदूषण करणाऱ्या हुल्लडबाज वाहनचालकांविरुद्ध नांदेड पोलीस प्रशासनाने मोठी मोहीम उघडली आहे. या मोहिमेअंतर्गत जप्त करण्यात आलेले ८४ अनधिकृत सायलेन्सर आज २४ मार्च रोजी भररस्त्यात रोड रोलरखाली चिरडून नष्ट करण्यात आले.
शहरातील मुख्य रस्त्यांवर अनेक दुचाकी चालक कंपनीने दिलेले अधिकृत सायलेन्सर काढून त्याऐवजी कानठळ्या बसवणारे अनधिकृत सायलेन्सर लावून फिरत असल्याचे निदर्शनास आले होते. या वाढत्या ध्वनी प्रदूषणामुळे नागरिक, रुग्ण आणि ज्येष्ठ नागरिकांना प्रचंड त्रास सहन करावा लागत होता, तसेच यामुळे कायदा व सुव्यवस्थेचा प्रश्नही निर्माण होत होता.
या प्रकाराची गंभीर दखल घेत नांदेड पोलीस दलाच्या वतीने विशेष मोहीम राबवण्यात आली. या मोहिमेदरम्यान एकूण ८४ दुचाकींवर अनधिकृत बदल केलेले सायलेन्सर आढळून आले. पोलिसांनी हे सर्व सायलेन्सर जप्त करून संबंधित वाहनचालकांवर दंडात्मक कारवाई केली. जप्त केलेले हे ८४ सायलेन्सर आज २४ मार्च २०२६ रोजी सायंकाळी ४:०० ते ४:३० च्या दरम्यान शहरातील महावीर चौक येथे रोड रोलरच्या साहाय्याने सर्वांसमोर नष्ट करण्यात आले.
अशीच मोहीम भविष्यातही सुरू राहणार:
अनधिकृत सायलेन्सर लावून नियमांचे उल्लंघन करणाऱ्यांविरुद्ध ही कारवाई इथवरच मर्यादित राहणार नसून, भविष्यातही अशा प्रकारे मोहीम राबवण्यात येणार असल्याचे पोलिसांनी स्पष्ट केले आहे. नागरिकांनी आपल्या वाहनांमध्ये कंपनीने ठरवून दिलेल्या मानकांनुसारच सायलेन्सर वापरावेत आणि वाहतूक नियमांचे पालन करावे, असे आवाहन नांदेड पोलीस प्रशासनाकडून करण्यात आले आहे.
यांच्या मार्गदर्शनाखाली झाली कारवाई:
सदर कारवाई पोलीस अधीक्षक श्री. अबिनाश कुमार, अपर पोलीस अधीक्षक श्री. सुरज गुरज यांच्या मार्गदर्शनाखाली पार पडली. या मोहिमेत उपविभागीय पोलीस अधिकारी श्री. रामेश्वर वेंजने, श्री. श्याम पानेगांवकर, स्थानिक गुन्हे शाखेचे पो.नि. श्री. उदय खंडराय, पो.नि. श्री. परमेश्वर कदम, पोहेकॉ वजीरबाद आणि शहर वाहतूक शाखेचे स.पो.नि. श्री. भागवत नागरगोजे यांच्यासह इतर अधिकारी व अंमलदारांनी सक्रिय सहभाग नोंदवला.