नांदेड २७ प्रतिनिधी माधव वाघमारे
नांदेड परिक्षेत्राचे पोलीस उप महानिरीक्षक श्री. शहाजी उमाप यांच्या मार्गदर्शनाखाली संपूर्ण परिक्षेत्रात गुटखा आणि प्रतिबंधित तंबाखूजन्य पदार्थांविरुद्ध मोठी मोहीम उघडण्यात आली आहे. गेल्या १० दिवसांत (१६ मार्च ते २५ मार्च २०२६) करण्यात आलेल्या या धडाकेबाज कारवाईत पोलिसांनी तब्बल ६० लाख २१ हजार १८९ रुपयांचा मुद्देमाल जप्त केला असून, ६० आरोपींना बेड्या ठोकल्या आहेत.
१० दिवसांचा कारवाईचा लेखाजोखा
कॅन्सरसारख्या गंभीर आजारांपासून नागरिकांचा बचाव व्हावा, या सामाजिक उद्देशाने ही मोहीम राबवली जात आहे. भारतीय न्याय संहिता (BNS) कलम १२३ अंतर्गत एकूण ५६ गुन्हे दाखल करण्यात आले आहेत. पोलिसांनी या मोहिमेत २ हजार पेक्षा जास्त पानटपऱ्या आणि दुकानांची झाडाझडती घेतली.
जिल्ह्यानुसार कारवाईचा तपशील: जिल्हा तपासलेली दुकाने/पानटपऱ्या दाखल गुन्हे (BNS 123) जप्त मुद्देमालाची किंमत (₹) अटक आरोपी नांदेड ३०५ २३ २५,३८,६४८ १८ परभणी ३९३ १२ ६,९६,६७४ १३ हिंगोली ३१६ १० ८,०९,८८२ १३ लातूर ९९६ ११ १९,७५,९८५ १६ एकूण २०१० ५६ ६०,२१,१८९ ६० जप्त मुद्देमाल आणि वाहने या मोहिमेदरम्यान केवळ गुटखाच नव्हे, तर त्याच्या वाहतुकीसाठी वापरली जाणारी वाहनेही जप्त करण्यात आली आहेत. यामध्ये एकूण ४ दुचाकी आणि ३ चारचाकी वाहनांचा समावेश आहे. सुगंधी तंबाखू, पानमसाला, खरा आणि मावा यांसारख्या घातक पदार्थांच्या साठवणुकीवर पोलिसांनी कडक प्रहार केला आहे. कठोर शिक्षेची तरतूद पोलीस प्रशासनाने स्पष्ट केले आहे की, या गुन्ह्यातील खटला सत्र न्यायालयात चालणार असून, दोषी आढळल्यास १० वर्षांपर्यंत कारावास आणि द्रव्य दंडाच्या शिक्षेची तरतूद आहे. यामुळे अवैध विक्रेत्यांचे धाबे दणाणले आहेत.
‘खबर’ हेल्पलाइनवर माहिती द्या!
अवैध व्यवसायांची माहिती थेट पोलिसांपर्यंत पोहोचवण्यासाठी ९१ ५० १०० १०० हा ‘खबर’ हेल्पलाइन क्रमांक कार्यान्वित करण्यात आला आहे. नागरिक या क्रमांकावर फोन करून किंवा व्हॉट्सॲप मेसेजद्वारे माहिती देऊ शकतात, असे आवाहन शहाजी उमाप यांनी केले आहे.
