ऑपरेशन डिग्निटी अंतर्गत युवतीला जीवदान तर तिकीट दलालांच्या मुसक्या आवळल्या

नांदेड |२८ मार्च प्रतिनिधी: माधव वाघमारे

दक्षिण मध्य रेल्वेच्या नांदेड विभागातील रेल्वे सुरक्षा बलाने (RPF) आपल्या सतर्कतेचा आणि संवेदनशीलतेचा प्रत्यय पुन्हा एकदा दिला आहे. ‘ऑपरेशन डिग्निटी’ अंतर्गत घर सोडून आलेल्या एका युवतीला सुरक्षित आश्रय मिळवून देण्यात आला, तर दुसऱ्या एका कारवाईत मानसिक तणावाखाली असलेल्या महिलेला तिच्या कुटुंबाच्या स्वाधीन करण्यात आले. याचसोबत तिकीट दलालांवरही आरपीएफने कठोर कारवाई केली आहे.
पुर्णा स्थानकावर महिला कॉन्स्टेबलची सतर्कता दिनांक २७ मार्च २०२६ रोजी दुपारी २:३० वाजताच्या सुमारास पुर्णा रेल्वे स्थानकावर कर्तव्यावर असलेल्या महिला कॉन्स्टेबल श्रीमती गुड्डीबाई मीणा यांना एका युवतीबद्दल माहिती मिळाली. ती युवती घरातून पळून आल्याचे समजताच मीणा यांनी तत्काळ प्लॅटफॉर्म क्रमांक १ वरून तिला ताब्यात घेतले. प्राथमिक चौकशीत ती मुंबईच्या जोगेश्वरी पूर्व भागातील असल्याचे निष्पन्न झाले. कायदेशीर प्रक्रिया आणि वैद्यकीय तपासणी पूर्ण केल्यानंतर, त्या युवतीला परभणी येथील ‘सखी वन स्टॉप सेंटर’ च्या स्वाधीन करण्यात आले आहे.
बेपत्ता महिलेचा परभणीत शोध; पतीच्या स्वाधीन दुसऱ्या एका घटनेत, पंजाबमधील बठिंडा येथील एक महिला मानसिक तणावामुळे हजूर साहिब नांदेड स्थानकावरून बेपत्ता झाली होती. ती महिला बेंगळुरू-नांदेड एक्सप्रेस (१६५९३) ने प्रवास करत असल्याची माहिती मिळताच परभणी स्थानकावर हेड कॉन्स्टेबल अविनाश पाटील आणि महिला कॉन्स्टेबल मुक्ता भिसे यांनी गाडीची कसून तपासणी केली. संबंधित महिला डब्यात सुरक्षित आढळल्यानंतर तिला आरपीएफ पोस्टवर आणले गेले आणि तिच्या पतीशी संपर्क साधून तिला सुखरूप त्यांच्या स्वाधीन करण्यात आले.
मुकुंदवाडीत तिकीट दलालांचा पर्दाफाश केवळ मानवतावादी कार्यच नव्हे, तर प्रवाशांची आर्थिक लूट रोखण्यासाठी आरपीएफने ‘ऑपरेशन उपलब्ध’ अंतर्गत मोठी कारवाई केली. मुकुंदवाडी रेल्वे स्थानकाच्या आरक्षण काउंटरवर सापळा रचून दोन दलालांना बेकायदेशीररीत्या तत्काळ तिकिटे विकताना रंगेहात पकडले.

• जप्त मुद्देमाल: ३,७६० रुपये किमतीची स्लीपर क्लासची तत्काळ तिकिटे.
• कारवाई: प्रत्येक प्रवाशाकडून २०० रुपये अतिरिक्त घेणाऱ्या या दलालांविरुद्ध रेल्वे अधिनियमाच्या कलम १४३ अंतर्गत गुन्हा दाखल करण्यात आला आहे.

“नांदेड विभागातील आरपीएफ प्रवाशांच्या सुरक्षेसाठी आणि रेल्वे परिसरातील गुन्हेगारी रोखण्यासाठी पूर्णपणे कटिबद्ध आहे. प्रवाशांनी कोणत्याही मदतीसाठी आरपीएफशी संपर्क साधावा  आरपीएफ प्रशासन, नांदेड विभाग