नांदेड ९ एप्रिल (प्रतिनिधी माधव वाघमारे)
धर्माबाद शहरात घरासमोरून मोटारसायकल चोरी करणाऱ्या सराईत चोरट्याला जेरबंद करण्यात धर्माबाद पोलिसांना यश आले आहे. पोलिसांनी आरोपीकडून ३० हजार रुपये किमतीची ‘फॅशन प्रो’ मोटारसायकल जप्त केली असून, न्यायालयाने आरोपीची रवानगी न्यायालयीन कोठडीत केली आहे.
नेमकी घटना काय?
धर्माबाद येथील बालाजी गल्लीत राहणारे व्यापारी धिरज गोवर्धन कासट (वय ४० वर्षे) यांची ‘फॅशन प्रो’ मोटारसायकल (क्र. MH 26 AE – 9250) दि. ४ एप्रिल रोजी रात्री ११:३० ते ५ एप्रिल रोजी पहाटे ६:०० वाजण्याच्या सुमारास घरासमोरून चोरीला गेली होती. याप्रकरणी धर्माबाद पोलीस ठाण्यात गुन्हा रजि. ७१/२०२५, कलम ३०३(२) भारतीय न्याय संहिता प्रमाणे गुन्हा दाखल करण्यात आला होता.
तपास आणि अटक:
नांदेडचे पोलीस अधीक्षक अविनाश कुमार यांनी जिल्ह्यातील मालमत्तेविरुद्धचे गुन्हे उघडकीस आणण्याचे आदेश सर्व प्रभारी अधिकाऱ्यांना दिले होते. या गुन्ह्याचा तपास पोलीस हेडकॉन्स्टेबल शेख यांच्याकडे सोपवण्यात आला होता. गस्त सुरू असताना पोलीस पथकाला एक संशयास्पद इसम दिसून आला. त्याला ताब्यात घेऊन सखोल चौकशी केली असता, त्याने सदर मोटारसायकल चोरल्याची कबुली दिली.
पोलिसांनी लक्ष्मण सायलू वरसा (वय २५ वर्षे, रा. बाजार गल्ली, बासर, जि. निझामाबाद) याला अटक करून त्याच्याकडून चोरीला गेलेली ३० हजार रुपये किमतीची दुचाकी जप्त केली आहे. आरोपीला न्यायालयात हजर केले असता त्याची रवानगी कारागृहात करण्यात आली आहे.
यांनी केली कारवाई:
सदर कारवाई पोलीस अधीक्षक अबिनाश कुमार, अप्पर पोलीस अधीक्षक अर्चना पाटील (भोकर), अप्पर पोलीस अधीक्षक सुरज गुरव (नांदेड) आणि उपविभागीय पोलीस अधिकारी दशरथ पाटील यांच्या मार्गदर्शनाखाली पोलीस निरीक्षक सदाशिव भडिकर, पोउपनि लोणेकर, सपोउपनि भालेराव, पोहेकाँ कुमरे, शेख, सय्यद आणि गडपवार यांनी यशस्वीरीत्या पार पाडली.
पोलीस पथकाने केलेल्या या कौतुकास्पद कामगिरीबद्दल पोलीस अधीक्षक अबिनाश कुमार यांनी त्यांचे विशेष कौतुक केले आहे.