नांदेड ११ एप्रिल (प्रतिनिधी माधव वाघमारे)
नांदेड शहरात सार्वजनिक शांतता राखण्यासाठी आणि गुन्हेगारीला आळा घालण्यासाठी पोलीस अधीक्षक श्री. अबिनाश कुमार यांच्या मार्गदर्शनाखाली ‘सिटी स्ट्रीट सेफ्टी ड्राईव्ह’ राबवण्यात येत आहे. या मोहिमेअंतर्गत दि. ९ व १० एप्रिल २०२६ रोजी नांदेड शहरातील विविध भागांत धाडसी कारवाई करण्यात आली. यामध्ये सार्वजनिक ठिकाणी दारू पिऊन हुल्लडबाजी करणाऱ्या २३ जणांवर, तर बेकायदेशीर शस्त्र बाळगणाऱ्या २ जणांवर कायदेशीर कारवाई करण्यात आली आहे.
विभागांनुसार झालेली कारवाई:
१. भाग्यनगर परिसर (शस्त्र जप्ती):
‘सिटी स्ट्रीट सेफ्टी ड्राईव्ह’ पथकाने पेट्रोलिंग दरम्यान क्लासेस परिसरात दोन इसमांना संशयास्पदरीत्या ताब्यात घेतले. त्यांच्याकडून लोखंडी खंजर हस्तगत करण्यात आला असून, त्यांच्यावर भारतीय हत्यार कायद्याच्या कलम ४/२५ अन्वये गुन्हा दाखल करण्यात आला आहे. यासोबतच परिसरातील वाईन शॉप आणि हॉटेलची तपासणी करण्यात आली.
२. वजीराबाद व शिवाजीनगर परिसर:
वजीराबाद येथील फटाका ग्राउंड आणि बसस्थानक परिसरात सार्वजनिक शांततेचा भंग करणाऱ्या ४ जणांवर महाराष्ट्र पोलीस कायदा कलम ११०/११७ नुसार कारवाई करण्यात आली. तसेच शिवाजीनगर येथील ज्योती टॉकीज रोड परिसरातही मद्यप्राशन करून गोंधळ घालणाऱ्या ४ जणांवर गुन्हा नोंदवण्यात आला आहे.
३. दामिनी पथकाची कामगिरी:
महिलांच्या सुरक्षिततेसाठी कार्यरत असलेल्या ‘दामिनी पथकाने’ आनंदनगर, शिवमंदिर, हनुमान मंदिर आणि हडको परिसरात पेट्रोलिंग करताना १५ जणांना सार्वजनिक ठिकाणी धिंगाणा घालताना पकडले. या सर्वांवर विमानतळ व नांदेड ग्रामीण पोलीस ठाण्यात गुन्हे दाखल करण्यात आले आहेत.
पोलीस अधीक्षकांचा कडक इशारा
नांदेडचे पोलीस अधीक्षक श्री. अबिनाश कुमार यांनी स्पष्ट शब्दांत ताकीद दिली आहे की, कोणीही सार्वजनिक ठिकाणी मद्यप्राशन करू नये किंवा मद्यप्राशनासाठी जागा उपलब्ध करून देऊ नये. अशा प्रकारांमुळे सार्वजनिक शांततेचा भंग झाल्यास संबंधित व्यक्तींवर यापुढेही कडक कायदेशीर कारवाई केली जाईल.
या मोहिमेत अपर पोलीस अधीक्षक श्री. सुरज गुरव, पथक प्रमुख सपोनि श्री. भागवत नागरगोजे, पोउपनि दर्शने आणि चार्ली पोलीस अंमलदारांनी महत्त्वपूर्ण भूमिका बजावली. या कारवाईमुळे शहरातील टवाळखोरांचे धाबे दणाणले आहेत.
