नांदेड २३ एप्रिल प्रतिनिधी
जिल्ह्यात अवैध धंद्यांविरुद्ध पोलिसांनी कंबर कसली असून, पोलीस अधीक्षक अबिनाश कुमार यांच्या मार्गदर्शनाखाली राबविण्यात येत असलेल्या ‘ऑपरेशन क्रॅक डाऊन’ अंतर्गत नांदेड ग्रामीण पोलिसांनी मोठी कारवाई केली आहे. वाजेगाव शिवारात सुरू असलेल्या जुगार अड्ड्यावर छापा टाकून पोलिसांनी पाच जणांना ताब्यात घेतले असून, त्यांच्याकडून ४ लाख ७२ हजार ९५० रुपयांचा मुद्देमाल जप्त करण्यात आला आहे.

नेमकी घटना काय?

पोलीस अधीक्षक अबिनाश कुमार यांनी जिल्ह्यातील सर्व पोलीस ठाण्यांना अवैध धंद्यांचे समूळ उच्चाटन करण्याचे आदेश दिले आहेत. त्याअनुषंगाने २२ एप्रिल रोजी रात्री ११ वाजेपासून नांदेड ग्रामीण पोलीस ठाण्याच्या हद्दीत ‘कॉम्बिंग ऑपरेशन’ आणि गस्त सुरू होती. २३ एप्रिल रोजी पहाटेच्या सुमारास पोलिसांना गुप्त माहिती मिळाली की, वाजेगाव ते मुदखेड रोडवरील आर.के. पेट्रोल पंपाजवळ असलेल्या मोकळ्या जागेत काही लोक ‘तिरत’ नावाचा जुगार खेळत आहेत.

पोलिसांचा धाडसी छापा

माहिती मिळताच नांदेड ग्रामीण पोलीस स्टेशनचे पोलीस निरीक्षक ओमकांत चिंचोलकर यांच्या नेतृत्वाखालील पथकाने पहाटे ०२:१० वाजताच्या सुमारास संबंधित ठिकाणी छापा टाकला. यावेळी पाच इसम पैशावर जुगार खेळताना रंगेहात सापडले. पोलिसांनी घटनास्थळावरून जुगाराचे साहित्य, रोख रक्कम, मोबाईल फोन आणि मोटारसायकल असा एकूण ४,७२,९५० रुपयांचा मुद्देमाल जप्त केला आहे.

पाच जणांविरुद्ध गुन्हा दाखल

या प्रकरणी पोलिसांनी खालील पाच आरोपींना ताब्यात घेतले आहे:
१) शेख रियाज शेख अहमद
२) शेख गफार शेख किजर अहमद
३) शेख अनिस शेख सरदार
४) शेख इसरार शेख अफसर
५) शेख माजीद शेख शफी (सर्व राहणार वाजेगाव, नांदेड)
या पाचही जणांविरुद्ध महाराष्ट्र जुगार प्रतिबंधक कायदा कलम १२ (अ) नुसार नांदेड ग्रामीण पोलीस ठाण्यात गुन्हा (गु.र.नं. ४३८/२०२६) दाखल करण्यात आला आहे.

या पथकाने केली कारवाई

ही यशस्वी कारवाई पोलीस अधीक्षक अबिनाश कुमार, अप्पर पोलीस अधीक्षक अर्चना पाटील (भोकर), अप्पर पोलीस अधीक्षक सुरज गुरव, आणि उपविभागीय पोलीस अधिकारी प्रशांत शिंदे (इतवारा) यांच्या मार्गदर्शनाखाली पार पडली. यामध्ये पोलीस निरीक्षक ओमकांत चिंचोलकर, फौजदार ज्ञानेश्वर मटवाड, पोलीस कर्मचारी अर्जुन मुंडे, कल्याणकर, पवार आणि सिरमलवार यांनी सहभाग घेतला.
या धडाकेबाज कामगिरीबद्दल पोलीस अधीक्षक अबिनाश कुमार यांनी पथकाचे विशेष कौतुक केले आहे.
वृत्त संकलन
प्रतिनिधी – माधव वाघमारे, नांदेड