नांदेड २३एप्रिल प्रतिनिधी
शहरातील वाढती गुन्हेगारी, चोऱ्या आणि शरीराविरुद्धच्या गुन्ह्यांना आळा घालण्यासाठी पोलीस अधीक्षक श्री. अबिनाश कुमार यांच्या मार्गदर्शनाखाली नांदेड पोलिसांनी ‘ऑपरेशन फ्लश आऊट’ अंतर्गत धडाकेबाज मोहीम हाती घेतली आहे. गेल्या ११ दिवसांत तब्बल १३४ रेकॉर्डवरील गुन्हेगारांवर कारवाई करण्यात आली असून, काल मध्यरात्री शहरात विशेष ‘कोम्बिंग ऑपरेशन’ राबवून गुन्हेगारांची धरपकड करण्यात आली.
मध्यरात्री पोलिसांचा फौजफाटा रस्त्यावर
दिनांक २२ एप्रिलच्या रात्री ११:०० वाजेपासून ते २३ एप्रिलच्या पहाटे ३:०० वाजेपर्यंत हे कोम्बिंग ऑपरेशन राबवण्यात आले. पोलीस अधीक्षक अबिनाश कुमार यांनी स्वतः मैदानात उतरून या मोहिमेचे नियोजन केले होते. यामध्ये अपर पोलीस अधीक्षक, उपविभागीय पोलीस अधिकारी, स्थानिक गुन्हे शाखेचे निरीक्षक, तसेच शहरातील विविध पोलीस ठाण्यांचे प्रभारी अधिकारी आणि १०२ अंमलदारांचा मोठा ताफा सहभागी झाला होता.
कारवाईचा तपशील
या मोहिमेदरम्यान पोलिसांनी रेकॉर्डवरील गुन्हेगार, तडीपार आरोपी, हिस्ट्रीशिटर आणि फरार आरोपींची कसून तपासणी केली. त्याचे आकडे खालीलप्रमाणे आहेत:
- तपासलेले तडीपार गुन्हेगार: ३९
- तपासलेले एमपीडीए (MPDA) मुक्त गुन्हेगार: २४
- तपासलेले शरीराविरुद्धचे सराईत गुन्हेगार: ५२
- आर्म ॲक्ट अंतर्गत कारवाई: ०४ गुन्हे
- कलम १२२ मपोका अंतर्गत कारवाई: ०२ गुन्हे
विविध पोलीस ठाण्यांतर्गत गुन्हे दाखल
कोम्बिंग ऑपरेशन दरम्यान इतवारा, स्थानिक गुन्हे शाखा (स्थागुशा), भाग्यनगर आणि विमानतळ पोलीस ठाण्याच्या हद्दीत एकूण ६ महत्त्वाच्या कारवाया करण्यात आल्या. यामध्ये तलवारीसारखी घातक शस्त्रे बाळगणाऱ्यांवर आणि संशयास्पद रित्या फिरणाऱ्यांवर गुन्हे नोंदवण्यात आले आहेत.
११ दिवसांतील कामगिरीचा आढावा
दिनांक ६ एप्रिल ते २२ एप्रिल या कालावधीत राबवण्यात आलेल्या विशेष मोहिमेत आतापर्यंत:
१. तडीपार उल्लंघन: कलम ५५ व ५६/५७ अन्वये तडीपार केलेल्यांपैकी ८ इसम शहरात मिळून आल्याने त्यांच्यावर कलम १४२ नुसार कारवाई करण्यात आली.
२. एकूण गुन्हे: सराईत गुन्हेगारांच्या तपासणीत एकूण १०७ आरोपींविरुद्ध ९३ गुन्हे दाखल करण्यात आले आहेत.
३. मुद्देमाल जप्ती: कलम १२(अ) नुसार ५ इसमांवर कारवाई करून ४,७२,९५० रुपयांचा मुद्देमाल जप्त करण्यात आला आहे.
नांदेड पोलिसांनी राबवलेल्या या आक्रमक मोहिमेमुळे गुन्हेगार गोटात मोठी खळबळ उडाली असून, नागरिकांनी सुरक्षिततेच्या दृष्टीने पोलिसांच्या या पावलाचे स्वागत केले आहे. आगामी काळातही अशाच प्रकारे सराईत गुन्हेगारांवर “राऊंडिंग अप” आणि तपासणीची मोहीम सुरूच राहणार असल्याचे पोलीस प्रशासनातर्फे स्पष्ट करण्यात आले आहे.
वृत्त संकलन
प्रतिनिधी – माधव वाघमारे, नांदेड.
