नांदेड २९ एप्रिल प्रतिनिधी
नांदेड परिक्षेत्राचे पोलीस उपमहानिरीक्षक यांच्या विशेष पथकाने अवैध धंद्यांविरुद्ध मोठी कारवाई करत नांदेड शहरातील एका मटका अड्डयावर धाड टाकली आहे. वजीराबाद पोलीस ठाण्याच्या हद्दीत सुरू असलेल्या या मटका जुगारावर पोलिसांनी ९ जणांना रंगेहात पकडले असून, एकूण १३ जणांविरुद्ध गुन्हे दाखल केले आहेत. या कारवाईत पोलिसांनी रोख रकमेसह एकूण ९२,१०० रुपयांचा मुद्देमाल जप्त केला आहे.
नेमकी घटना काय?
नांदेड शहरातील कलामंदिर बसस्थानकाजवळील एका शेडमध्ये मटका जुगार सुरू असल्याची गोपनीय माहिती पोलीस उपमहानिरीक्षक कार्यालयाच्या अवैध व्यवसाय विरोधी पथकास मिळाली होती. या माहितीची शहानिशा करून पथकाने दिनांक २८/०४/२०२६ रोजी त्या ठिकाणी छापा टाकला.
या कारवाईदरम्यान मटका खेळताना ९ इसम आढळून आले. पोलिसांनी त्यांना ताब्यात घेऊन झडती घेतली असता त्यांच्याकडे ३७,६०० रुपये रोख, २६,५०० रुपये किमतीचे ७ मोबाईल आणि २८,००० रुपयांचे संगणक असा एकूण ९२,१०० रुपयांचा मुद्देमाल मिळून आला. पोलिसांनी हा सर्व माल जागीच जप्त केला आहे.
मटका मालकांवरही गुन्हे दाखल
अटक करण्यात आलेल्या इसमांकडे चौकशी केली असता, त्यांनी हा मटका अड्डा चालवणाऱ्या चार मालकांची नावे सांगितली आहेत. यामध्ये:
१) कमल यादव (रा. दिलीपसिंह कॉलनी, नांदेड)
२) अन्वर शेख (रा. समीराबाग, नांदेड)
३) माधव भुसेवाड (रा. शिवशक्तीनगर, मिलरोड)
४) राजेश शर्मा (रा. कलामंदिर, नांदेड)
यांचा समावेश आहे. वजीराबाद पोलीस ठाण्यात या १३ जणांविरुद्ध ‘महाराष्ट्र जुगार कायदा’ कलम ४, ५ अन्वे गुन्हा नोंदवण्यात आला असून पुढील तपास पोहेकॉ गणपत शेळके यांच्याकडे सोपवण्यात आला आहे.
यांनी केली कारवाई
ही यशस्वी कारवाई पोलीस उपनिरीक्षक पंकज इंगळे, पोहेकॉ प्रदीप खानसोळे, पोहेकॉ संजीव जिंकलवाड, पोकॉ गणेश धुमाळ आणि पोकॉ कामाजी गवळी यांच्या पथकाने केली. पथकाच्या या कामगिरीबद्दल पोलीस उपमहानिरीक्षक श्री. शहाजी उमाप यांनी सर्वांचे अभिनंदन केले आहे.
‘खबर’ हेल्पलाईनवर माहिती देण्याचे आवाहन
परिक्षेत्रातील अवैध व्यवसायांना पायबंद घालण्यासाठी पोलीस उपमहानिरीक्षक कार्यालयाने ‘खबर’ नावाची विशेष हेल्पलाईन सुरू केली आहे. नागरिकांनी आपल्या भागातील अवैध धंद्यांची माहिती ९१ ५० १०० १०० या क्रमांकावर फोन करून किंवा व्हॉट्सॲप मेसेजद्वारे द्यावी, असे आवाहन श्री. शहाजी उमाप यांनी केले आहे.
वृत्त संकलन:
प्रतिनिधी: माधव वाघमारे
