नांदेड पोलिसांचे ऑपरेशन फ्लॅश आऊट दरोड्याच्या तयारीत असलेल्या टोळीचा पर्दाफाश गावठी पिस्तुलसह पाच आरोपी गजाआड

नांदेड २८ एप्रिल (प्रतिनिधी माधव वाघमारे)
नांदेड जिल्हयातील गुन्हेगारीला लगाम घालण्यासाठी पोलीस अधीक्षक अबिनाश कुमार यांच्या मार्गदर्शनाखाली राबविण्यात येत असलेल्या ‘ऑपरेशन फ्लॅश आऊट’ला मोठे यश आले आहे. शहरात कोंबिंग ऑपरेशन सुरू असताना दरोडा टाकण्याच्या तयारीत असलेल्या पाच सराईत गुन्हेगारांना स्थानिक गुन्हे शाखेने (LCB) बेड्या ठोकल्या आहेत. त्यांच्याकडून एक गावठी पिस्तुल, जिवंत काडतूस आणि धारदार शस्त्रांसह १ लाख ३२ हजार १६० रुपयांचा मुद्देमाल जप्त करण्यात आला आहे.

नेमकी घटना काय?

नांदेड शहरात २७ एप्रिलच्या रात्री ११ वाजेपासून ते २८ एप्रिलच्या पहाटे ५ वाजेपर्यंत विशेष कोंबिंग ऑपरेशन राबविण्याचे आदेश पोलीस अधीक्षकांनी दिले होते. यादरम्यान, स्थानिक गुन्हे शाखेचे सहाय्यक पोलीस निरीक्षक विठ्ठल घोगरे व त्यांच्या पथकाला गोपनीय माहिती मिळाली की, कामठा बाजार ते गाडेगाव जाणारे रोडवरील रेल्वे पटरीजवळील उड्डाणपुलाखाली काही संशयित तरुण घातक शस्त्रांसह दरोडा टाकण्याच्या तयारीत थांबले आहेत.

पोलिसांची धाडसी कारवाई

मिळालेल्या माहितीच्या आधारे पोलिसांनी सापळा रचून सदर ठिकाणी छापा टाकला. यावेळी पोलिसांनी पाच जणांना ताब्यात घेतले. त्यांची झडती घेतली असता, त्यांच्याकडे एक गावठी पिस्तुल, एक जिवंत काडतूस, लोखंडी खंजर, लोखंडी गजाळी, दोरी, मिरची पावडर आणि मोबाईल असा एकूण १,३२,१६० रुपयांचा मुद्देमाल मिळून आला. पोलिसांनी तातडीने हा सर्व माल जप्त केला आहे.

अटक करण्यात आलेले आरोपी

१. योगेश उर्फ गोट्या चंदर सोनावणे (रा. हर्षनगर, नांदेड)
२. राहुल नागनाथ काळे (रा. साठे चौक, खोब्रागडे नगर, नांदेड)
३. राम ज्ञानेश्वर कांबळे (रा. चिखलवाडी, मुदखेड)
४. श्रावण रामजी जोंधळे (रा. नवीन आबादी, मुदखेड)
५. मनोज साहेबराव कदम (रा. मगनपुरा, नवीन मोंढा, नांदेड)

विमानतळ पोलीस ठाण्यात गुन्हा दाखल

याप्रकरणी विमानतळ पोलीस ठाण्यात भारतीय न्याय संहिता कलम ३१०(४) आणि शस्त्र अधिनियम कलम ३/२५, ४/२५ नुसार गुन्हा नोंदवण्यात आला आहे. ही यशस्वी कारवाई पोलीस अधीक्षक अविनाश कुमार, अपर पोलीस अधीक्षक अर्चना पाटील, सुरज गुरव यांच्या मार्गदर्शनाखाली स्थानिक गुन्हे शाखेचे पोलीस निरीक्षक अतुल भोसले, सपोनि विठ्ठल घोगरे आणि त्यांच्या पथकाने केली आहे.
पोलिस अधीक्षकांनी या कामगिरीबद्दल संबंधित अधिकारी व कर्मचाऱ्यांचे विशेष कौतुक केले आहे. या कारवाईमुळे नांदेडमधील गुन्हेगारी जगतात मोठी खळबळ उडाली आहे.