नांदेड ११ मे प्रतिनिधी
जिल्ह्यात अवैध धंद्यांविरुद्ध सुरू असलेल्या ‘ऑपरेशन क्रॅक डाऊन’ मोहिमेला मोठे यश आले आहे. नांदेड ग्रामीण पोलिसांनी एमआयडीसी परिसरातील आदित्य वजन काट्याजवळ सुरू असलेल्या एका जुगार अड्ड्यावर धाड टाकून १ लाख ३ हजार ५० रुपयांचा मुद्देमाल जप्त केला आहे. या कारवाईत चार आरोपींना रंगेहात पकडून त्यांच्यावर महाराष्ट्र जुगार प्रतिबंधक अधिनियमांतर्गत गुन्हा दाखल करण्यात आला आहे.
कारवाईचा तपशील
मिळालेल्या गोपनीय माहितीनुसार, १० मे २०२६ रोजी दुपारी ३:०० वाजेच्या सुमारास एमआयडीसी नांदेड येथील आदित्य वजन काट्याजवळ काही लोक अवैध जुगार खेळत होते. या माहितीची खातरजमा करून पोलीस निरीक्षक ओमकांत चिंचोलकर व त्यांच्या पथकाने सापळा रचला. पोलिसांनी अचानक छापा टाकून जुगार खेळणाऱ्या चार जणांना ताब्यात घेतले.
अटकेतील आरोपींची नावे:
१) विलास प्रल्हादराव गजभारे (वय ४५, रा. गोपाळचावडी)
२) नारायण बळीराम चिटलेवार (वय ५०, रा. बळीरामपूर)
३) प्रसाद संजय सुर्यवंशी (वय २३, रा. येळी, ता. लोहा)
४) संदिप धोंडोबा जगदंबे (वय ३९, रा. वागलवाडा, ता. उमरी)
जप्त केलेला मुद्देमाल
पोलिसांनी घटनास्थळावरून जुगाराचे साहित्य, रोख रक्कम, एक मोटारसायकल आणि दोन मोबाईल फोन असा एकूण १,०३,०५० रुपयांचा मुद्देमाल हस्तगत केला आहे.
यांच्या मार्गदर्शनाखाली झाली कारवाई
ही धडक कारवाई पोलीस अधीक्षक अबिनाश कुमार, अपर पोलीस अधीक्षक (भोकर) श्रीमती अर्चना पाटील, अपर पोलीस अधीक्षक (नांदेड) सूरज गुरव, आणि उपविभागीय पोलीस अधिकारी (इतवारा) प्रशांत शिंदे यांच्या मार्गदर्शनाखाली करण्यात आली.
या मोहिमेत पोलीस निरीक्षक ओमकांत चिंचोलकर, पोलीस उपनिरीक्षक व्यंकट कुसमे, वसंत केंद्रे, मारोती पंचलिंग, शंकर माळगे, समीर अहमद आणि धम्मपाल कांबळे यांचा समावेश होता. नांदेड ग्रामीण पोलिसांच्या या कामगिरीचे जिल्हा पोलीस अधीक्षकांनी कौतुक केले आहे.
बातमी: प्रतिनिधी माधव वाघमारे
