नांदेड ५ जून प्रतिनिधी
जिल्ह्यात अवैध धंद्यांविरुद्ध सुरू असलेल्या ‘ऑपरेशन क्रॅकडाऊन’ अंतर्गत सोनखेड पोलिसांनी रेतीची अवैध चोरटी वाहतूक करणाऱ्यांवर अत्यंत मोठी आणि धडक कारवाई केली आहे. दिनांक ४ जून २०२६ रोजी केलेल्या या कारवाईत पोलिसांनी तब्बल ४ विनानंबर हायवा गाड्या आणि २० ब्रास रेतीसह एकूण १,८१,१५,००० (१ कोटी ८१ लाख १५ हजार) रुपयांचा मुद्देमाल जप्त केला आहे. या प्रकरणी ४ आरोपींविरुद्ध गुन्हे दाखल करण्यात आले आहेत.
पेट्रोलिंग दरम्यान मिळाली यश
पोलीस अधीक्षक कार्यालयाने प्रसिद्ध केलेल्या पत्रकानुसार, नांदेडचे पोलीस अधीक्षक मा. श्री. अबिनाश कुमार यांनी जिल्ह्यातील सर्व पोलीस स्टेशन प्रभारींना अवैध रेतीची चोरटी वाहतूक व विक्री करणाऱ्यांवर कडक कारवाई करण्याचे आदेश दिले होते.
या आदेशाच्या अनुषंगाने, दिनांक ०४/०६/२०२६ रोजी पहाटे ०५:०० ते ०७:०० वाजेच्या सुमारास सोनखेड पोलीस स्टेशनचे अधिकारी व अंमलदार हे परिसरात पेट्रोलिंग करत होते. पेट्रोलिंग दरम्यान दगडगाव मागे बेटसांगवी कडून सोनखेड रोडवर चार विनानंबर हायवा वाहने संशयास्पद रित्या जाताना दिसली. पोलिसांनी तात्काळ ही वाहने थांबवून त्यांची तपासणी केली असता, प्रत्येक वाहनात ५ ब्रास याप्रमाणे एकूण २० ब्रास रेती आढळून आली. या रेती वाहतुकीबाबत चालकांकडे कोणताही वैध परवाना किंवा रॉयल्टी नसल्याचे निष्पन्न झाले.
४ आरोपींना अटक व गुन्हे दाखल
अवैध रेतीची वाहतूक केल्याप्रकरणी सोनखेड पोलीस ठाण्यात गुन्हा रजि. नं. ११६/२०२६, ११७/२०२६, ११८/२०२६ आणि ११९/२०२६ अन्वये भारतीय न्याय संहिता (BNS) कलम ३०३(२) सह गौण खनिज अधिनियम ४७, ४८ प्रमाणे वेगवेगळे गुन्हे दाखल करण्यात आले आहेत.
कारवाई करण्यात आलेल्या आरोपींची नावे:
१. मारोती दत्ता कदम (वय ३४ वर्षे, रा. शेवगाव, ता. लोहा)
२. सचिन साहेबराव राठोड (रा. आडगाव तांडा, ता. लोहा)
३. सुनिल रमेश राठोड (रा. बाचोटी तांडा, ता. कंधार)
४. संतोष गोविंद राठोड (रा. आडगाव तांडा, ता. लोहा)
१ कोटी ८१ लाखांचा मुद्देमाल जप्त
पोलिसांनी घटनास्थळावरून खालील मुद्देमाल जप्त केला आहे:
- ०४ विनानंबर हायवा गाड्या
- २० ब्रास रेती
- ०३ मोबाईल फोन
एकूण अंदाजित किंमत: १,८१,१५,०००/- रुपये
वरिष्ठांचे मार्गदर्शन व पोलीस टीम
ही धडक कारवाई पोलीस अधीक्षक मा. श्री. अबिनाश कुमार, अपर पोलीस अधीक्षक मा. श्री. सुरज गुरव, अपर पोलीस अधीक्षक (भोकर) मा. श्रीमती अर्चना पाटील, आणि उपविभागीय पोलीस अधिकारी (कंधार) मा. श्रीमती डॉ. अश्विनी जगताप यांच्या थेट मार्गदर्शनाखाली करण्यात आली.
या कारवाईत सोनखेड पोलीस ठाण्याचे स.पो.नि. श्री भागवत नागरगोजे, पोउपनि वैशाली कांबळे, सपोउपनि विश्वनाथ हंबर्डे, पोहेकॉ वामन नागरगोजे, गंगाधर शिंदे, पोकों दिगंबर कवाळे, लोभाजी वाघमारे, रमेश वाघमारे आणि उत्तम देवकते यांनी उत्कृष्ट कामगिरी बजावली. या यशस्वी कामगिरीबद्दल पोलीस अधीक्षक मा. श्री. अविनाश कुमार यांनी संपूर्ण पोलीस टीमचे कौतुक व अभिनंदन केले आहे.
वृत्त संकलन व संपादन:
प्रतिनिधी: माधव वाघमारे
