नांदेड १४ जून
(विमानतळ पोलीस स्टेशन) नांदेड जिल्ह्यातील अवैध व्यवसायांचे समूळ उच्चाटन करण्यासाठी पोलीस अधीक्षक मा.श्री. अविनाश कुमार यांनी ‘ऑपरेशन क्रॅकडाऊन’ अंतर्गत कडक मोहीम हाती घेतली आहे. या मोहिमेअंतर्गत विमानतळ पोलीस ठाण्याच्या हद्दीत चालणाऱ्या एका मोठ्या जुगार अड्डयावर धाडसी छापा टाकून पोलिसांनी तब्बल २८ आरोपींविरुद्ध गुन्हा दाखल केला आहे. या कारवाईत रोख रक्कम, वाहने आणि मोबाईल असा एकूण १८,७१,०००/- रुपयांचा मुद्देमाल जप्त करण्यात आला असून, यामुळे अवैध धंदेवाल्यांचे धाबे दणाणले आहेत.
मनोरंजन केंद्राच्या नावाखाली चालत होता जुगार
मिळालेल्या माहितीनुसार, गाडेगाव रोड, कामठा शिवार (नांदेड) परिसरातील जगनलाल यादव यांच्या जागेत काही इसम शासन अधिकृत मनोरंजन केंद्राचा परवाना असल्याचे भासवत होते. मात्र, प्रत्यक्षात तिथे मनोरंजनाचे खेळ न खेळता अवैध रितीने ‘पपलू’ नावाचा पत्त्यांचा जुगार पैशावर खेळत आणि खेळवत असल्याची गोपनीय माहिती पोलिसांना मिळाली.
या माहितीच्या आधारे उपविभागीय पोलीस अधिकारी (नांदेड शहर) श्री. रामेश्वर वैंजने आणि विमानतळ पोलीस ठाण्याचे पोलीस निरीक्षक श्री. रामदास शेंडगे व त्यांच्या पथकाने १३ जून २०२६ रोजी रात्री २०:३० वाजण्याच्या सुमारास अचानक छापा टाकला. १४ जून रोजी पहाटे ०४:३८ वाजता याप्रकरणी विमानतळ पोलीस ठाण्यात गुन्हा रजिस्टर नंबर २७४/२०२६ नुसार कलम ४, ५ म.जु.का. अंतर्गत गुन्हा दाखल करण्यात आला.
१८ लाखांपेक्षा जास्त मुद्देमाल जप्त
पोलिसांनी घटनास्थळावरून जुगाराच्या साहित्यासह खालील मुद्देमाल हस्तगत केला आहे:
- जुगाराचे साहित्य व एकूण ३२० प्लास्टिक कॉईन
- २० नामांकित कंपन्यांचे मोबाईल फोन
- ०८ मोटार सायकली
- ०२ चारचाकी कार (गाड्या)
एकूण जप्त किंमत: १८,७१,०००/- रुपये
या आरोपींवर झाली कारवाई
कारवाईत पोलिसांनी घटनास्थळावरून मुख्य आरोपींसह एकूण २८ जणांवर गुन्हा नोंदवला आहे. प्रामुख्याने शुभम संजयसिंह ठाकुर (रा. गाडीपुरा नांदेड), विजयसिंह करणसिंह ठाकुर, सत्यनारायण विजयसिंह बैस, सोमेश्वर कोंडीबा आचमारे (रा. शिवनगर नांदेड), प्रकाश जळबाजी जमदाडे (रा. पूर्णा, जि. परभणी), शेख शफी शेख मोईन, सोनु संजयसिंह ठाकुर, कुंदन प्रकाश सुर्यतळ (रा. आंबेडकर नगर), राजुसिंह ग्यानसिंह ठाकुर, मोहम्मद गौस मोहम्मद आसीफ, विक्रमसिंह तारासिंह परमार, अदनान अली नासेर अली (रा. पिरबुऱ्हाण) यांच्यासह इतर १६ आरोपींचा यामध्ये समावेश आहे. या गुन्ह्याचा फिर्यादी विमानतळ पोलीस ठाण्याचे पोउपनि मोहम्मद साजीद हुसेन यांनी दिला आहे.
वरिष्ठ अधिकाऱ्यांचे मार्गदर्शन व पथक
कोपीही यशस्वी कामगिरी पोलीस अधीक्षक मा.श्री. अबिनाश कुमार, अपर पोलीस अधीक्षक (भोकर) श्रीमती अर्चना पाटील, अपर पोलीस अधीक्षक (नांदेड) मा.श्री. सुरज गुरव, आणि उपविभागीय पोलीस अधिकारी श्री. रामेश्वर वैंजने यांच्या थेट मार्गदर्शनाखाली करण्यात आली.
या कारवाईत विमानतळ पो.स्टे.चे पोलीस निरीक्षक श्री. रामदास शेंडगे, पोउपनि श्री. सचिन शिंदे, पोउपनि श्री. साजीद हुसेन, वजीराबाद पो.स्टे.चे पोउपनि श्री. सुनील बुलंगे आणि विमानतळ, वजीराबाद व उपविभागीय पोलीस अधिकारी कार्यालयातील अंमलदार शेख जावेद, पोवळे, पाकलवाड, राठोड, शेख शोएब, भुसे, मठपती, कदम, कड्ढनवार, झंपलवाड, लांडगे व क्षीरसागर यांनी सहभाग घेतला.
या धडक आणि कौतुकास्पद कामगिरीबद्दल पोलीस अधीक्षक मा.श्री. अविनाश कुमार यांनी संपूर्ण पोलीस पथकाचे विशेष अभिनंदन केले आहे. सदर गुन्ह्याचा पुढील तपास सपोनि लोखंडे हे करत आहेत.
वृत्त संकलन व बातमी: प्रतिनिधी – माधव वाघमारे, नांदेड.
