पोटच्या मुलानेच रचला घरफोडीचा कट मैत्रिणीच्या मदतीने घरातील ९ लाख ७० हजार लुटले, नांदेड पोलिसांची ४८ तासांत मोठी कारवाई

नांदेड  १ जुलै (प्रतिनिधी माधव वाघमारे)
नायगाव पोलीस ठाण्याच्या हद्दीत घडलेल्या एका खळबळजनक घरफोडीचा छडा लावण्यात नांदेडच्या स्थानिक गुन्हे शाखेला (LCB) अवघ्या दोन दिवसांत यश आले आहे. धक्कादायक बाब म्हणजे, फिर्यादीच्या स्वतःच्या मुलानेच आपल्या मैत्रिणीसोबत मिळून हा घरफोडीचा कट रचल्याचे पोलीस तपासात उघड झाले आहे. पोलिसांनी तत्परतेने कारवाई करत ९ लाख ३६ हजार ६०० रुपयांची रोख रक्कम हस्तगत केली असून एका विधिसंघर्षग्रस्त बालिकेला ताब्यात घेतले आहे.

देवदर्शनाचे निमित्त साधून डल्ला

पोलीस सूत्रांकडून मिळालेल्या माहितीनुसार, फिर्यादी कुटुंब २६ जून २०२६ रोजी देवदर्शनासाठी बाहेर जाणार होते. हीच संधी साधून फिर्यादीचा मुलगा शुभम कौठकर याने आपल्या मैत्रिणीला (विधिसंघर्षग्रस्त बालिका) घराच्या कुलुपाची अतिरिक्त चावी कुठे ठेवली आहे, याची पूर्वकल्पना दिली. तसेच घरात प्लॉट खरेदीसाठी मोठी रोकड ठेवली असल्याची माहितीही त्याने तिला दिली होती.
ठरलेल्या कटानुसार, कुटुंब बाहेर जाताच संबंधित बालिकेने अतिरिक्त चावीचा वापर करून घरात प्रवेश केला आणि लोखंडी पेटीत ठेवलेली ९ लाख ७० हजार रुपयांची रक्कम चोरून पोबारा केला.

अशी झाली गुन्ह्याची उकल

घरफोडीची घटना समोर आल्यानंतर पोलीस अधीक्षक मा. श्री. डॉ. शिलभ रोहन यांच्या मार्गदर्शनाखाली स्थानिक गुन्हे शाखेचे पोलीस निरीक्षक श्री. अतुल भोसले यांनी तात्काळ तपासाची चक्रे फिरवली. पोउपनि नागनाथ तुकडे व त्यांच्या पथकाने गोपनीय माहिती आणि परिसरातील सीसीटीव्ही (CCTV) फुटेजच्या आधारे तपास सुरू केला.
संशयावरून फिर्यादीचा मुलगा शुभम कौठकर याची सखोल चौकशी केली असता, त्याने आपल्या मैत्रिणीच्या मदतीने हा गुन्हा केल्याची कबुली दिली. शुभमच्या कबुलीनंतर पोलिसांनी तात्काळ कारवाई करत चोरी गेलेल्या रकमेपैकी ९ लाख ३६ हजार ६०० रुपये रोख हस्तगत केले.

कारवाई करणारे पोलीस पथक

ही उल्लेखनीय कामगिरी पोलीस अधीक्षक मा. श्री. डॉ. नीलाभ रोहन, अप्पर पोलीस अधीक्षक (भोकर) मा. श्रीमती अर्चना पाटील, अपर पोलीस अधीक्षक (नांदेड) मा. श्री. सुरज गुरव यांच्या मार्गदर्शनाखाली पोलीस निरीक्षक अतुल भोसले, पोउपनि नागनाथ तुकडे, सपोउपनि दारासिंग राठोड, पोलीस अंमलदार मोहन हाके, महेश बडगु, ब्रह्मानंद लामतुरे, शिलराज ढवळे, शितल सोळंके, लहू चाटे आणि आबाराव पिंगलवाड यांनी केली आहे. याप्रकरणी पुढील कायदेशीर कारवाई सुरू आहे.
बातमी प्रतिनिधी माधव वाघमारे, नांदेड.