नांदेड ११ जुलै ( प्रतिनिधी माधव वाघमारे)
नांदेड जिल्ह्यात अवैध व्यवसायांवर प्रभावी नियंत्रण मिळवण्यासाठी पोलीस प्रशासनाने कंबर कसली आहे. पोलीस अधीक्षक मा. श्री. डॉ. नीलाभ रोहन यांच्या मार्गदर्शनाखाली जिल्ह्यात विशेष मोहीम राबविण्यात येत आहे. याच मोहिमेचा भाग म्हणून पोलीस स्टेशन नांदेड ग्रामीणच्या पथकाने एका अवैध जुगार अड्ड्यावर छापा टाकून एकूण ७ आरोपींविरुद्ध गुन्हा दाखल केला असून, ५ लाख २ हजार ७२० रुपये किमतीचा मुद्देमाल जप्त केला आहे.
गुप्त माहितीच्या आधारे टाकला छापा
दिनांक १० जुलै २०२६ रोजी नांदेड ग्रामीण पोलीस ठाण्याचे अधिकारी व कर्मचारी परिसरात पेट्रोलिंग करत होते. दरम्यान, रामजीनगर, वसरणी येथील मोकळ्या जागेत काही व्यक्ती पैशांची हार-जीत लावून ‘तिरट’ नावाचा जुगार खेळत असल्याची खात्रीशीर माहिती पोलिसांना मिळाली. माहिती मिळताच पोलिसांनी दोन पंचांच्या उपस्थितीत सदर ठिकाणी अत्यंत गोपनीयतेने छापा टाकला.
७ आरोपी ताब्यात; ५ मोटारसायकलसह मुद्देमाल जप्त
या कारवाईदरम्यान जुगार खेळताना एकूण ७ आरोपी आढळून आले. यामध्ये खालील इसमांचा समावेश आहे:
१. दिगंबर माधवराव जटाळे (रा. वसरणी)
२. श्याम हरिभाऊ मनाळकर (रा. वसरणी)
३. गजानन भीमराव चव्हाण (रा. रुबी हॉटेलजवळ, सिडको)
४. सचिन भागवत आहेर (रा. चौफाळा, नांदेड)
५. शिलानंद पिराजी एडके (रा. वसरणी)
तसेच इतर २ अनोळखी इसम.
पोलिसांनी या आरोपींकडून ०५ मोटार सायकल, ०३ मोबाईल फोन, नगदी रोख रक्कम आणि इतर जुगार साहित्य असा एकूण ५,०२,७२०/- रुपयांचा मुद्देमाल जप्त केला आहे. याप्रकरणी पोलीस स्टेशन नांदेड ग्रामीण येथे गु.र.नं. ८५३/२०२६ अन्वये कलम १२ (अ), महाराष्ट्र जुगार प्रतिबंध अधिनियमांतर्गत गुन्हा दाखल करण्यात आला आहे.
या अधिकाऱ्यांच्या मार्गदर्शनात झाली कारवाई
सदर यशस्वी कारवाई मा. श्री. डॉ. नीलाभ रोहन (पोलीस अधीक्षक, नांदेड), सुरज गुरव (अपर पोलीस अधीक्षक, नांदेड) व प्रशांत शिंदे (उपविभागीय पोलीस अधिकारी, इतवारा विभाग) यांच्या मार्गदर्शनाखाली करण्यात आली.
या कारवाईत प्रत्यक्ष पोलीस निरीक्षक ओमकांत चिंचोलकर, पोलीस उपनिरीक्षक बाबुराव चव्हाण तसेच पोलीस अंमलदार कारामुंगे, जेंकुट, कदम, जाधव, सिरमलवार व शेख (सर्व नेमणूक पो.स्टे. नांदेड ग्रामीण) यांनी मोलाची कामगिरी बजावली.
पोलीस प्रशासनाचा इशारा:
नांदेड जिल्ह्यात अवैध जुगार, अवैध दारू, गुटखा, अवैध वाळू उपसा व वाहतूक यासारख्या बेकायदेशीर व्यवसायांविरुद्ध भविष्यातही अशीच कठोर कारवाई सुरू राहणार असल्याचा इशारा पोलीस प्रशासनाने दिला आहे. ही माहिती जनसंपर्क अधिकारी आशिष सिताराम बोराटे (पोलीस अधीक्षक कार्यालय, नांदेड) यांनी प्रसिद्धीपत्रकाद्वारे दिली आहे.
