नांदेड मध्ये अवैध वाळू वाहतुकीवर भाग्यानगर पोलिसांची धडक कारवाई

प्रतिनिधी : माधव वाघमारे (नांदेड)
नांदेड ३ ऑगस्ट
नांदेड जिल्हा पोलीस अधीक्षक मा. डॉ. नीलाभ रोहन यांच्या मार्गदर्शनाखाली जिल्ह्यात अवैध धंद्यांविरोधात सुरू असलेल्या विशेष मोहिमेअंतर्गत भाग्यानगर पोलीस ठाण्याच्या हद्दीत अवैध रेतीची वाहतूक करणाऱ्या हायवा टिपरवर धडक कारवाई करण्यात आली. या कारवाईत पोलिसांनी सुमारे २० लाख २० हजार रुपये किमतीचा मुद्देमाल जप्त केला आहे.
मिळालेल्या माहितीनुसार, दिनांक २ ऑगस्ट २०२६ रोजी भाग्यानगर पोलीस ठाण्याचे प्रभारी अधिकारी यांना गुप्त बातमीदाराद्वारे माहिती मिळाली की, हायवा टिपर (क्रमांक MH 26 CH 5959) मधून चैतन्य नगर ते तरोडा रोड मार्गाने विनापरवाना अवैध रेतीची वाहतूक केली जात आहे. माहिती मिळताच पोलिसांनी तात्काळ सापळा रचून संबंधित वाहन रोखले.
वाहनाच्या चालकाची चौकशी केली असता त्याने आपले नाव मल्कार्जुन व्यंकटी एलके (वय ३३ वर्ष, रा. ब्राह्मणवाडा, ता. जि. नांदेड) असे सांगितले. वाहनातील रेतीबाबत त्याच्याकडे आवश्यक परवाना किंवा रॉयल्टीची कागदपत्रे मागितली असता, तो कोणताही वैध दस्तऐवज सादर करू शकला नाही. त्यानंतर पोलिसांनी पंचांसमक्ष पंचनामा करून ५ ब्रास रेती (अंदाजे किंमत २०,००० रुपये) आणि हायवा टिपर (अंदाजे किंमत २०,००,००० रुपये) असा एकूण २०,२०,००० रुपयांचा मुद्देमाल जप्त केला.
याप्रकरणी भाग्यानगर पोलीस ठाण्यात गुन्हा क्रमांक ४१३/२०२६ अन्वये भारतीय न्याय संहिता, २०२३ चे कलम ३०३(२) सह कलम ४८(७)(८) महाराष्ट्र जमीन महसूल अधिनियम अंतर्गत गुन्हा दाखल करण्यात आला असून पुढील तपास भाग्यानगर पोलीस करत आहेत.
ही कारवाई जिल्हा पोलीस अधीक्षक मा. डॉ. नीलाभ रोहन यांच्या मार्गदर्शनाखाली भाग्यानगर पोलीस ठाण्याचे पोलीस निरीक्षक संतोष तांबे, पोलीस निरीक्षक महेश माळी, सहाय्यक पोलीस निरीक्षक बालाजी महाजन, शरदचंद्र सावरे, कांबळे व त्यांच्या पथकाने पार पाडली.
दरम्यान, नांदेड जिल्हा पोलीस अवैध गौण खनिज उत्खनन व वाहतूक करणाऱ्यांविरुद्ध यापुढेही कठोर कारवाई सुरू ठेवणार असून, नागरिकांनी अशा प्रकारच्या बेकायदेशीर कृत्यांची माहिती पोलिसांना देऊन सहकार्य करावे, असे आवाहन पोलीस प्रशासनाकडून करण्यात आले आहे.