अर्धपूर ४ जुलै (विशेष प्रतिनिधी)
नांदेड जिल्ह्यातील गोवंश अवैध वाहतुकीवर चाप लावण्यासाठी पोलीस अधीक्षक मा. डॉ. नीलाभ रोहन यांच्या मार्गदर्शनाखाली विशेष मोहीम राबवली जात आहे. या मोहिमेअंतर्गत अर्धपूर पोलीस ठाण्याच्या पथकाने ३ ऑगस्ट २०२६ रोजी पहाटेच्या सुमारास मालेगाव परिसरातील शिवाजी चौक येथे सापळा रचून धाडसी कारवाई केली. वसमत येथून अर्धपूरमार्गे कत्तलीसाठी नेण्यात येणाऱ्या १० गोवंश जनावरांची सुटका करत पोलिसांनी ३१ लाख ५१ हजार ५०० रुपयांचा मुद्देमाल जप्त केला आहे.
कारवाईचा सविस्तर तपशील: अर्धपूर पोलीस ठाण्याचे प्रभारी अधिकारी पोनि. महादेव मांजरमकर यांना वसमतवरून पिकअप वाहनांद्वारे अवैध गोवंश वाहतूक होणार असल्याची गुप्त माहिती मिळाली होती. या माहितीच्या आधारे पोलिसांनी दोन पथके तयार करून शिवाजी चौक, मालेगाव परिसरात नाकाबंदी केली.
संशयित वाहनांची तपासणी केली असता:
- बोलेरो पिकअप (MH-26-BE-7657): ५ गोवंश जनावरे.
- महिंद्रा बोलेरो पिकअप (MH-26CH-2628): ५ गोवंश जनावरे.
एकूण १० गोवंश जनावरांना अत्यंत निर्दयपणे दोऱ्यांनी बांधून, कोणत्याही वैद्यकीय किंवा कायदेशीर परवानगीशिवाय कत्तलीसाठी वाहून नेले जात असल्याचे उघडकीस आले. तसेच या वाहनांना टेहळणी करून मदत करणाऱ्या दोन कार (MH-02-EU-7086 आणि MH-38-V-4666) देखील पोलिसांनी ताब्यात घेतल्या.
जप्त केलेला मुद्देमाल (एकूण किंमत ₹३१,५१,५००/-):
- दोन बोलेरो पिकअप वाहने: अंदाजे किंमत ₹१४,००,०००/-
- दोन चारचाकी कार: अंदाजे किंमत ₹१०,५०,०००/-
- १० गोवंश जनावरे: अंदाजे किंमत ₹५,२०,०००/-
- विविध कंपन्यांचे ८ मोबाईल फोन: अंदाजे किंमत ₹१,८१,०००/-
ताब्यात घेतलेले आरोपी: १. शेख माजिद शेख आरिफ (वय ३९, रा. मदीनानगर, अर्धपूर) २. मिरासाब अब्दुल शेख (वय ३१, रा. खुदबेनगर चौरस्ता, देगलूर नाका, नांदेड) ३. शेख सोहेल शेख नसीर (वय २५, रा. मदीनानगर, अर्धपूर) ४. उमर सलीम कुरेशी (वय २७, रा. वांगी रोड, परभणी) ५. सय्यद शहाबाज सय्यद रेहबर (वय २४, रा. मदीनानगर, परभणी) ६. मोहम्मद रिजवान पिता अब्दुल रहमान (वय २९, रा. खुदबेनगर चौरस्ता, नांदेड) ७. मोहम्मद शहाबाज पिता मोहम्मद जाफर कुरेशी (वय १९, रा. खुदबेनगर चौरस्ता, देगलूर नाका, नांदेड) ८. अब्दुल फैजान पिता अब्दुल खय्युम कुरेशी (वय २०, रा. इकबाल नगर, देगलूर नाका, नांदेड)
गुन्हा दाखल व पुढील कारवाई: या प्रकरणी अर्धपूर पोलीस ठाण्यात गुन्हा रजि. क्र. ४२०/२०२६ अन्वये महाराष्ट्र पशू संरक्षण अधिनियम १९७६, प्राण्यांचा छळ प्रतिबंधक अधिनियम १९६० आणि भारतीय न्याय संहितेच्या विविध कलमांनुसार गुन्हा नोंदवण्यात आला आहे. मुक्त करण्यात आलेल्या गोवंशाची सुरक्षित व्यवस्था करण्यात आली आहे.
ही कारवाई पोलीस अधीक्षक मा. डॉ. नीलाभ रोहन यांच्या आदेशाने पोनि. महादेव मांजरमकर यांच्या नेतृत्वाखाली सपोनि. भास्कर कांबळे, पोउपनि. सुरेश भोसले आणि पोलीस अंमलदार मुंगल, भिसे, कदम, हेमंत बिचकेवार यांनी यशस्वीरीत्या पार पाडली.
विशेष वृत्त: प्रतिनिधी माधव वाघमारे
