नांदेड 20 नोव्हेंबर
देगलूर | (प्रतिनिधी) माधव वाघमारे
घरकुल योजनेच्या हप्त्यासाठी चार हजार रुपयांची लाच मागणाऱ्या ग्रामसेवकाला लाचलुचपत प्रतिबंधक विभागाच्या (ACB) पथकाने रंगेहाथ पकडले. ही कारवाई बुधवार, दिनांक 19 नोव्हेंबर 2025 रोजी देगलूर तालुक्यातील भायगाव येथे करण्यात आली.
भायगाव येथील एका ग्रामपंचायत सदस्याने घरकुल बिलाच्या मंजुरीसाठी ग्रामसेवकाकडे फाईल पाठवली होती. ही फाईल मंजूर करण्यासाठी ग्रामसेवक वामन शेषराव बिराजदार यांनी 4,000 रुपयांची लाच मागितली. लाच देण्याची इच्छा नसलेल्या ग्रामपंचायत सदस्याने तत्काळ लाचलुचपत प्रतिबंधक विभागाकडे तक्रार दाखल केली.
त्यानुसार ACB पथकाने पडताळणी करून बुधवारी दुपारी देगलूर पंचायत समिती कार्यालय परिसरात सापळा रचला. तक्रारदाराकडून चार हजारांची लाच स्वीकारताच ग्रामसेवक वामन बिराजदार यांना ACB पथकाने रंगेहाथ अटक केली.
यापूर्वीही तक्रारदारांच्या चुलत्याच्या नावावर घरकुल मंजूर झाले होते. पहिला 15,000 रुपयांचा हप्ता मिळाल्यानंतर, पुढील हप्त्यासाठी बिराजदार यांनी स्थळ पाहणी आणि पंचनामा करण्याच्या बदल्यात 5,000 रुपयांची मागणी केली होती. 13 नोव्हेंबर रोजीही त्यांनी पुन्हा 5,000 रुपयांची मागणी केल्याचे तक्रारीत नमूद आहे.
नांदेड जिल्ह्यात घरकुल आणि इतर योजना मंजुरीसाठी लाच मागण्याच्या घटना सतत वाढत असून, नागरिकांमध्ये नाराजीचे वातावरण निर्माण झाले आहे.
ACBचे आवाहन:
सरकारी कामासाठी कोणीही अवैधरित्या पैसे मागत असल्यास नागरिकांनी कोणतीही भीती न बाळगता तात्काळ लाचलुचपत प्रतिबंधक विभागाकडे तक्रार नोंदवावी, असे आवाहन विभागाने केले आहे.
