नांदेडमध्ये ऑपरेशन क्रॅकडाऊन अंतर्गत मोठी कारवाई

नांदेड  २० मे ( प्रतिनिधी माधव वाघमारे)

नांदेड जिल्ह्याला अमली पदार्थांच्या विळख्यातून मुक्त करण्यासाठी पोलीस प्रशासनाने कंबर कसली आहे. पोलीस अधीक्षक अबिनाश कुमार यांच्या मार्गदर्शनाखाली स्थानिक गुन्हे शाखेने (LCB) ‘ऑपरेशन क्रॅकडाऊन’ अंतर्गत धडक कारवाई करत तब्बल ७२.०३ ग्रॅम ब्राऊन शुगर (चिट्टा) आणि एक स्कुटी असा एकूण ४ लाख ७० हजार २७० रुपयांचा मुद्देमाल जप्त केला आहे. याप्रकरणी चार आरोपींना ताब्यात घेण्यात आले असून वजीराबाद पोलीस ठाण्यात गुन्हा दाखल करण्यात आला आहे.

गुप्त माहितीच्या आधारे रचला सापळा

नांदेड कोर्ट ते हिंगोली गेट जाणाऱ्या बायपास रोडवर अमृतसर (पंजाब) येथून आलेली एक महिला अमली पदार्थ विक्रीसाठी येणार असल्याची खात्रीशीर गुप्त माहिती स्थानिक गुन्हे शाखेचे सपोनि रवि वाहुळे यांना मिळाली होती. माहिती मिळताच वरिष्ठ अधिकाऱ्यांना अवगत करून कायदेशीर प्रक्रियेसह या परिसरात तात्काळ छापा मारण्यात आला.

चार आरोपी पोलिसांच्या ताब्यात

पोलिसांनी घटनास्थळावरून दोन मुख्य आरोपींना ताब्यात घेतले. त्यांच्या चौकशीत या गुन्ह्यात सामील असलेल्या इतर दोन साथीदारांची नावे समोर आल्यानंतर त्यांनाही पोलिसांनी अटक केली. ताब्यात घेतलेल्या आरोपींची नावे खालीलप्रमाणे आहेत:
१) राजविंदर कौर जर्मनजितसिंग महाल (वय ३८ वर्ष, रा. दुरीया, जि. अमृतसर, पंजाब)
२) गुरमुखसिंग उर्फ गुरी सेवकसिंग गिल (वय २८ वर्ष, रा. गुरूद्वारा गेट नं. ६, शहिदपुरा, नांदेड)
३) अमनप्रितसिंग उर्फ मनी जगजीतसिंग वेदी (वय ३० वर्ष, रा. गुरूद्वारा गेट नं. ०२, नांदेड)
४) जनार्धन उर्फ पटेल गोविंदराव सोनटक्के (वय ३१ वर्ष, रा. ब्राम्हणवाडा, ता. जि. नांदेड)

४ लाख ७० हजारांचा मुद्देमाल जप्त

पोलिसांनी आरोपींची झडती घेतली असता त्यांच्याकडून खालील मुद्देमाल जप्त करण्यात आला:

• अमली पदार्थ (ब्राऊन शुगर/चिट्टा): ७२.०३ ग्रॅम (किंमत रु. ३,६०,१५०/-)
• वाहन: एक विना नंबरी ॲक्टिव्हा स्कुटी (किंमत रु. १,१०,०००/-)
• रोख रक्कम: नोटांच्या पुंगळ्या केलेले १२०/- रुपये.
  (एकूण जप्त मुद्देमाल: ४,७०,२७०/- रुपये)

वरिष्ठ अधिकाऱ्यांचे मार्गदर्शन व पथकाची कामगिरी

ही धडक कारवाई पोलीस अधीक्षक मा. श्री. अबिनाश कुमार, अपर पोलीस अधीक्षक (भोकर) मा. श्रीमती अर्चना पाटील, आणि अपर पोलीस अधीक्षक (नांदेड) मा. श्री. सुरज गुरव यांच्या मार्गदर्शनाखाली करण्यात आली.
या मोहिमेत स्थानिक गुन्हे शाखेचे पोलीस निरीक्षक श्री. अतुल भोसले, सपोनि रवि वाहुळे, आणि त्यांच्या पथकातील पोउपनि दासरे, पोहेकॉ देवीदास चव्हाण, दिलीप चंचलवार, ज्ञानोबा कवठेकर, रितेश कुलथे, उमर शेख, मपोहेकॉ शितल सोळंके, पोकों मोतीराम पवार, चापोहेकॉ सिद्धार्थ सोनसळे तसेच खंडणी विरोधी पथकातील पोहेकॉ शिलराज ढवळे, ब्रम्हानंद लामतुरे, प्रदिप गर्दंनमारे, व्यंकट गंगुलवार, राजवंतसिंग बुंगाई, चापोकों हेमंत बिचकेवार आणि सायबर सेलचे राजू सिटीकर व दिपक ओढणे यांनी महत्त्वाची भूमिका बजावली.
या उत्कृष्ट कामगिरीबद्दल पोलीस अधीक्षक महोदयांनी संपूर्ण पोलीस अधिकारी व अंमलदारांचे विशेष कौतुक केले आहे. याप्रकरणी पुढील तपास वजीराबाद पोलीस करत आहेत.