नांदेड २६ जुलै (प्रतिनिधी माधव वाघमारे)
देगलूर शहरातील तोटावार गल्ली येथे घडलेल्या घरफोडीच्या गुन्ह्याचा देगलूर पोलीस ठाण्याच्या पथकाने अवघ्या २४ तासांच्या आत छडा लावला आहे. पोलिसांनी अज्ञात आरोपीचा शोध घेऊन त्याला अटक केली असून त्याच्याकडून चोरीचा मुद्देमाल जप्त केला आहे. न्यायालयाने आरोपीची १४ दिवसांच्या न्यायालयीन कोठडीत (MCR) रवानगी केली आहे.

नेमकी काय आहे घटना?

मिळालेल्या माहितीनुसार, दिनांक २४ जुलै २०२६ रोजी रात्री १०:३० ते २५ जुलै २०२६ रोजी सकाळी ०८:०० वाजेच्या दरम्यान, देगलूर शहरातील तोटावार गल्ली येथील रहिवासी फिर्यादी अभिषेक श्यामसुंदर भावनगीरकर (वय २३ वर्षे) यांच्या काकांच्या घराचे कुलूप तोडून अज्ञात चोरट्याने घरात प्रवेश केला. स्वयंपाकघरातील डब्यात ठेवलेली ₹१०,०००/- ची रोख रक्कम चोरून नेली होती. याप्रकरणी देगलूर पोलीस ठाण्यात गुन्हा क्रमांक ३५६/२०२६, कलम ३०५(अ) व ३३१(४) भारतीय न्याय संहिता (BNS) २०२३ अन्वये गुन्हा दाखल करण्यात आला होता.

गोपनीय माहिती अन् तांत्रिक तपासाच्या आधारे कारवाई

गुन्हा दाखल झाल्यानंतर पोलीस निरीक्षक सूर्यमोहन बोलमवाड यांच्या मार्गदर्शनाखाली गुन्हे शोध पथकाने समांतर तपास सुरू केला. गोपनीय माहिती आणि तांत्रिक तपासाच्या आधारे पोलिसांनी संशयित आरोपी शेख इस्माईल शेख सुलतान (वय ४२ वर्षे, रा. मोमीन गल्ली, देगलूर) यास ताब्यात घेतले.
पोलीस खाक्या दाखवताच आरोपीने गुन्ह्याची कबुली दिली, ज्यानंतर त्याच्याकडून चोरी झालेला सर्व मुद्देमाल जप्त करण्यात आला. आरोपीस देगलूर येथील न्यायालयात हजर केले असता, मा. न्यायालयाने त्यास १४ दिवसांची न्यायालयीन कोठडी सुनावली आहे. अवघ्या २४ तासांत घरफोडीचा गुन्हा उघडकीस आणल्यामुळे देगलूर पोलिसांचे सर्वत्र कौतुक होत आहे.

या पथकाने केली कामगिरी

ही उल्लेखनीय कामगिरी नांदेडचे पोलीस अधीक्षक मा. डॉ. निलाभ रोहन आणि देगलूरचे उपविभागीय पोलीस अधिकारी किरण पोपळघट यांच्या मार्गदर्शनाखाली पार पडली.
तपास पथकात देगलूर पोलीस ठाण्याचे पोलीस निरीक्षक सूर्यमोहन बोलमवाड, पोलीस उपनिरीक्षक महाजन व मैसनवाड, तसेच गुन्हे शोध पथकातील अंमलदार किरणकुमार वाघमारे, मोहम्मद इम्रान, वैजनाथ मोटरगे, शिवाजी आडवे आणि विशाल आटकोरे यांचा समावेश होता.