नांदेड १८ ऑगस्ट (प्रतिनिधी माधव वाघमारे)
नांदेड जिल्ह्यातील फरार आरोपी व मोटरसायकल चोरांवर कडक कारवाई करण्याचे आदेश जिल्हा पोलीस अधीक्षक मा. डॉ. नीलाभ रोहन यांनी दिले होते. या आदेशान्वये स्थानिक गुन्हे शाखेच्या (LCB) पथकाने धडक कारवाई करत सहा गंभीर गुन्ह्यांमध्ये फरार असलेल्या एका विधीसंघर्षग्रस्त बालकास ताब्यात घेतले आहे. त्याच्याकडून चोरीस गेलेली एक रॉयल एनफिल्ड बुलेट मोटरसायकल असा एकूण ₹१ लाखाचा मुद्देमाल जप्त करण्यात आला आहे.
आसना ब्रिजजवळ सापळा रचून कारवाई
दिनांक १५ ऑगस्ट २०२६ रोजी स्थानिक गुन्हे शाखेचे पोउउपनि नागनाथ तुकडे व त्यांच्या पथकास बातमीदाराकडून गुप्त माहिती मिळाली की, विविध गुन्ह्यांमध्ये फरार असलेला एक विधीसंघर्षग्रस्त बालक चोरीची बुलेट घेऊन नांदेड येथील आसना ब्रिजच्या बाजूस असलेल्या ‘Avenue City’ च्या रोडवर थांबलेला आहे. माहितीची खातरजमा करून पथकाने तात्काळ घटनास्थळी धाड टाकून संबंधित बालकास ताब्यात घेतले.
किल्ला रोडवरून केली होती बुलेट चोरी
बालकाकडे चौकशी केली असता त्याने सुमारे दोन महिन्यांपूर्वी किल्ला रोड, इतवारा (नांदेड) येथून रॉयल एनफिल्ड कंपनीची बुलेट चोरी केल्याची कबुली दिली. पोलीस ठाणे इतवारा येथे दाखल गु.र.नं. २७४/२०२६ (कलम ३०३(२) BNS) अन्वये तपास केला असता हीच बुलेट चोरीस गेल्याचे निष्पन्न झाले. पोलिसांनी सुमारे ₹१,००,०००/- किमतीची ही बुलेट हस्तगत केली आहे.
६ गुन्ह्यांत होता फरार
पोलीस अभिलेखाची पाहणी केली असता, सदर विधीसंघर्षग्रस्त बालक नांदेड आणि परभणी जिल्ह्यातील एकूण ६ गुन्ह्यांमध्ये फरार असल्याचे उघडकीस आले:
- पोलीस ठाणे नायगाव: गु.र.नं. १५३/२०२६ (कलम ३०५, ३३१(४), ६२ BNS)
- पोलीस ठाणे नायगाव: गु.र.नं. १५४/२०२६ (कलम ३०३(२) BNS)
- पोलीस ठाणे कुंटूर: गु.र.नं. १६४/२०२६ (कलम ३०५, ३३१(४) BNS)
- पोलीस ठाणे मुदखेड: गु.र.नं. १२२/२०२६ (कलम ३०५(अ), ३३१(४) BNS)
- पोलीस ठाणे पालम (जि. परभणी): गु.र.नं. २७३/२०२६ (कलम ३३४(४), ३०५(अ) BNS)
- पोलीस ठाणे पिंपळदरी (जि. परभणी): गु.र.नं. १२६/२०२६ (कलम ३०५(अ), ३३१(१), ३(५) BNS)
तपास पथक: ही यशस्वी कामगिरी मा. डॉ. नीलाभ रोहन (पोलीस अधीक्षक, नांदेड) यांच्या आदेशावरून अतुल भोसले (पोलीस निरीक्षक, स्थानिक गुन्हे शाखा, नांदेड) यांच्या मार्गदर्शनाखाली पोउउपनि नागनाथ तुकडे, पोलीस अंमलदार धारासिंग राठोड, मोहन हाके, ब्रह्मानंद लामतुरे, आबाराव पिंगलवाड, लहू चाटे आणि महेश बडगु यांच्या पथकाने केली.
