खंजीरने वार करून एकाची निघृण हत्या दोन्ही आरोपी पोलिसांच्या जाळ्यात वजिराबाद पोलिसांची धडाकेबाज कारवाई

नांदेड १८ ऑगस्ट (प्रतिनिधी माधव वाघमारे)

नांदेड शहरातील मध्यवर्ती बसस्थानक परिसरात जुन्या वादाच्या कारणावरून एका ४२ वर्षीय इसमावर खंजीरने सपासप वार करून त्याची अत्यंत क्रूरपणे हत्या करण्यात आल्याची धक्कादायक घटना घडली आहे. ही घटना दि. १६ ऑगस्ट २०२६ रोजी रात्रीच्या सुमारास घडली असून, घटनेची माहिती मिळताच वजिराबाद पोलिसांनी तत्परता दाखवत दोन्ही आरोपींना तात्काळ ताब्यात घेतले आहे.

नेमकी काय आहे घटना?

मिळालेल्या सविस्तर माहितीनुसार, दि. १६ ऑगस्ट २०२६ रोजी रात्री सुमारे २३:३० वाजताच्या सुमारास मध्यवर्ती बसस्थानक परिसरातील श्री लॉजसमोर जुन्या वादाची ठिणगी पडली. या ठिकाणी सय्यद एजाज सय्यद बाबर व शेख सिराज़ोद्दीन शेख बद्रोद्दीन (वय ४२ वर्ष, रा. मिलगेट, नांदेड) यांच्यात तीव्र भांडण झाले. या वादादरम्यान नितेश अग्रवाल याच्या सांगण्यावरून सय्यद एजाज याने आपल्याजवळील धारदार शस्त्राने (खंजीरने) शेख सिराज़ोद्दीन यांच्या शरीरावर गंभीर वार केले. या प्राणघातक हल्ल्यात शेख सिराज़ोद्दीन हे गंभीर जखमी झाले व त्यांचा जागीच मृत्यू झाला.

गुन्हा दाखल आणि पोलिसांची जलद कारवाई

घटनेची माहिती मिळताच वजिराबाद पोलीस ठाण्याच्या पथकाने कसलाही विलंब न करता थेट घटनास्थळी धाव घेतली. पोलिसांनी अत्यंत सतर्कता दाखवत मुख्य आरोपी १. सय्यद एजाज सय्यद बाबर (वय ३२ वर्ष, रा. मिलगेट रोड, नांदेड) याला घटनास्थळावरूनच तात्काळ ताब्यात घेतले.

तर घटनेनंतर फरार झालेला दुसरा आरोपी २. नितेश गोपालदास अग्रवाल (वय ५१ वर्ष, रा. शिवशक्ती नगर रोड, नांदेड) याला गुन्हे शोध पथकाने गोपनीय व तांत्रिक माहितीच्या आधारे शोध घेऊन शिताफीने ताब्यात घेतले.

या प्रकरणी वजिराबाद पोलीस ठाण्यात गुन्हा रजि. क्र. ०४१२/२०२६ अन्वये भारतीय न्याय संहिता (BNS), २०२३ च्या कलम १०३(१), ३(५) तसेच शस्त्र अधिनियम कलम ४, २५, २७ नुसार गुन्हा दाखल करण्यात आला आहे. घटनेचे गांभीर्य लक्षात घेता पोलिसांनी दाखवलेल्या तत्परतेमुळे दोन्ही आरोपी तात्काळ जेरबंद झाले आहेत.

या अधिकाऱ्यांच्या मार्गदर्शनाखाली झाली कारवाई

सदर यशस्वी कामगिरी मा. डॉ. नीलाभ रोहन (पोलीस अधीक्षक, नांदेड) यांच्या आदेशावरून व रामाेश्वर वैंजने (पोलीस उप अधीक्षक, नांदेड शहर) यांच्या मार्गदर्शनाखाली पार पडली.

या कारवाईत पोनि/अजित कुंभार, सपोनि/प्रशांत लोंढे, सपोनि/विठ्ठल दुरपडे, पोउपनि/सुनिल बुलंगे, पोउपनि/खंडु दर्शने तसेच गुन्हे शोध पथकातील पोलीस अंमलदार अरुण साखरे, विलास कदम, ज्वालासिंग बावरी, संतोष पोकळे, संतोष पावडे, भाऊसाहेब राठोड, इम्रान पठाण, शरद सोनटक्के, विजयकुमार नंदे, येमेकर, भगवान गिते, किशोर जयस्वाल, बालाजी सातपुते यांनी सहभाग नोंदवला.

या प्रकरणाचा पुढील सखोल तपास वजिराबाद पोलीस ठाण्याचे अधिकारी करत आहेत.