नांदेड दि. 7 नोव्हेंबर : (प्रतिनिधी) माधव वाघमारे राष्ट्रभावनेला आज नव्या उमेदीनं पुन्हा उजाळा देत, “वंदे मातरम्” या अद्वितीय राष्ट्रगीतातील 150 व्या वर्धापन दिनानिमित्त नांदेड जिल्ह्यात सामूहिक गायनाचा भव्य उपक्रम अत्यंत उत्साहात पार पडला. जिल्हा प्रशासनाच्या मार्गदर्शनाखाली व श्री गुरू गोबिंदसिंघजी शासकीय औद्योगिक प्रशिक्षण संस्था यांच्या पुढाकाराने हा उपक्रम राबविण्यात आला.
जिल्ह्यातील सर्व शाळा, महाविद्यालये, शासकीय कार्यालये, विविध संस्थांमधील हजारो विद्यार्थी, शिक्षक, अधिकारी व कर्मचारी सकाळी 10 वाजता एकाच वेळी देशभक्तीने ओथंबलेल्या “वंदे मातरम्” गीताच्या स्वरात सामील झाले. नांदेड येथील श्री गुरूग्रंथ साहिबजी भवन येथे मुख्य कार्यक्रमाचे आयोजन करण्यात आले होते. देशभक्तीच्या वातावरणात विद्यार्थ्यांची उपस्थिती अनोखी, तर अधिकारी-कर्मचाऱ्यांची सहभागाची ऊर्जा उल्लेखनीय होती.
या प्रसंगी मनपा आयुक्त डॉ. महेशकुमार डोईफोडे, निवासी उपजिल्हाधिकारी किरण अंबेकर, उपविभागीय अधिकारी डॉ. सचिन खल्लाळ, जिल्हा शल्य चिकित्सक डॉ. संजय पेरके, तहसिलदार संजय वारकड, गुरुद्वारा अधीक्षक हरजितसिंग कडेवाले, शहर पोलीस उपअधीक्षक रामेश्वर वैजने, जिल्हा युवा अधिकारी चंदा रावळकर, प्राचार्य सुर्यवंशी यांच्यासह विविध शाळांचे शिक्षक, विद्यार्थी आणि अनेक शासकीय अधिकारी-कर्मचारी उपस्थित होते.
दिल्ली येथे प्रधानमंत्री नरेंद्र मोदी यांच्या उपस्थितीत सुरु असलेला वंदे मातरम् सामूहिक गायन कार्यक्रमही दूरदृश्यप्रणालीद्वारे सर्वांना दाखविण्यात आला.
‘वंदे मातरम्’ हे गीत बंकिमचंद्र चट्टोपाध्याय यांनी 1875 साली रचले. स्वातंत्र्य संग्रामात देशभक्तीची प्रेरणा देणारे हे गीत 150 वर्ष पूर्ण झाल्याच्या निमित्ताने, 7 नोव्हेंबर 2025 ते 7 नोव्हेंबर 2026 या दरम्यान चार टप्प्यात राज्यभर विविध देशभक्तीपर उपक्रम राबविण्यात येणार आहेत. कौशल्य विकास व सांस्कृतिक कार्य संचालनालयाच्यावतीने या कार्यक्रमांची आखणी करण्यात आली आहे.
कार्यक्रमात विद्यार्थ्यांनी “वंदे मातरम्” वर आधारित लघुनाटिकाही सादर केली. देशभक्ती, ऐक्य आणि राष्ट्रीय अभिमानाची भावना अधिक वृद्धिंगत करण्यासाठी या उपक्रमाने जिल्हा पातळीवर मजबूत पायाभरणी केली आहे.
नांदेडने आज पुन्हा एकदा “वंदे मातरम्”चा जयघोष करत राष्ट्रभक्तीची धडधड अनुभवली
