प्रतिनिधी २४ सप्टेंबर माधव वाघमारे
नांदेड: आगामी गणेशोत्सव व विसर्जन मिरवणुका अत्यंत शांततेत, सौहार्दपूर्ण वातावरणात आणि निर्विघ्नपणे पार पाडाव्यात, यासाठी नांदेड जिल्हा पोलीस प्रशासनाने गुन्हेगारी प्रवृत्तीविरुद्ध कडक प्रतिबंधात्मक मोहीम हाती घेतली आहे. पोलीस अधीक्षक मा. डॉ. नीलाभ रोहन यांच्या संकल्पनेतून जिल्ह्यात ‘2+ स्कीम’ (दोन किंवा त्यापेक्षा अधिक गंभीर गुन्हे दाखल असलेल्या सराईत गुन्हेगारांची स्वतंत्र यादी) प्रभावीपणे राबवण्यात येत आहे.
या पार्श्वभूमीवर, दिनांक 25 सप्टेंबर रोजी होणाऱ्या मुख्य गणेश विसर्जन मिरवणुका डोळ्यासमोर ठेवून नांदेड जिल्हा पोलीस दल पूर्णपणे सतर्क झाले आहे. उत्सवाचा पूर्वइतिहास आणि कायदा-सुव्यवस्थेची संवेदनशीलता लक्षात घेऊन, सार्वजनिक शांततेला धोका निर्माण करणाऱ्या सराईत गुन्हेगारांवर आणि उपद्रवी घटकांवर भारतीय नागरिक सुरक्षा संहिता (BNSS) 2023 च्या कलम 163 अन्वये धडक प्रतिबंधक मोहीम राबवण्यात आली आहे.
विशेष मोहिमेची ठळक वैशिष्ट्ये:
- महाराष्ट्र शासनाच्या गृह विभागाच्या आदेशान्वये प्राप्त विशेषधिकाऱ्यांचा वापर करून ही विशेष मोहीम पोलीस अधीक्षक मा. डॉ. नीलाभ रोहन यांच्या मार्गदर्शनाखाली अपर पोलीस अधीक्षक तथा विशेष प्राधिकृत कार्यकारी दंडाधिकारी श्रीमती अर्चना पाटील व मा. सुरज गुरव यांनी हाती घेतली आहे.
- संपूर्ण जिल्ह्यातून विविध पोलीस ठाण्यामार्फत एकूण 828 इसमाविरुद्ध कलम 163 अन्वये प्रतिबंधक प्रस्ताव दाखल करण्यात आला असून, नांदेड विभागातील 468 तर भोकर विभागातील 360 समाजकंटकांवर गावात थांबण्यास बंदी घालणारे अंतिम मनाई आदेश पारित करण्यात आले आहेत.
- यामध्ये गावात अवैध दारू विक्री, जुगार किंवा इतर अवैध धंदे चालवून किरकोळ कारणावरून वाद, मारहाण व दहशत निर्माण करणारे घटक तसेच मिरवणूक मार्गावर जाणीवपूर्वक घोषणाबाजी, धक्काबुक्की अथवा सामाजिक तेढ निर्माण करण्याचा पूर्वइतिहास असलेले इसम तसेच प्रतिबंधक कारवाई करूनही वर्तनात सुधारणा न दाखवणाऱ्यांवर थेट गावात येण्यास अथवा थांबण्यास मनाई हुकूम जारी करण्यात आला आहे.
पोलीस ठाणेनिहाय हद्दपार करण्यात आलेल्यांची आकडेवारी:
- वजिराबाद: 50
- शिवाजीनगर: 35
- भाग्यनगर: 50
- इतवारा: 55
- नांदेड ग्रामीण: 50
- उस्माननगर: 09
- देगलूर: 25
- मुखेड: 09
- मरखेल: 20
- नायगाव: 92
- रामतीर्थ: 33
- कύνर: 40
- अर्धापूर: 74
- मुदखेड: 16
- भोकर: 15
- हदगाव: 50
- उमरी: 29
- कुंडलवाड: 52
- माहूर: 20
- सिंदखेड: 52
- किनवट: 32
- इस्लापूर: 10
- लिंबगाव: 10
- एकूण: 828
ज्या व्यक्तीविरुद्ध भारतीय नागरिक सुरक्षा संहितेच्या कलम 163 अन्वये अंतिम मनाई आदेश जारी करण्यात आले आहेत, त्यांनी विसर्जन मिरवणुकीच्या दिवशी संबंधित गावात किंवा मिरवणूक परिसरात प्रवेश करू नये अथवा थांबू नये. या आदेशाचे उल्लंघन केल्यास संबंधिताविरुद्ध भारतीय न्याय संहिता (BNS) व महाराष्ट्र पोलीस अधिनियमनातील तरतुदींनुसार तात्काळ गुन्हे दाखल करून कठोर कायदेशीर कारवाई केली जाईल.
नागरिकांनी तसेच गणेश मंडळांनी शांतता राखून उत्सव साजरा करावा आणि संशयास्पद हालचाली दिल्यास तात्काळ जवळच्या पोलीसेशी संपर्क साधावा, असे आवाहन पोलीस अधीक्षक मा. डॉ. नीलाभ रोहन यांच्या वतीने करण्यात आले आहे.
