नांदेड:२९ डिसेंबर (प्रतिनिधी) माधव वाघमारे
नांदेड : गुन्हेगारांच्या छातीत धडकी भरवणारी कारवाई, कायद्याचा वचक प्रभावीपणे प्रस्थापित करत गुन्हेगारीला आळा घालणारे आणि संपूर्ण जिल्ह्यात आपली निर्भीड व कर्तव्यनिष्ठ ओळख निर्माण करणारे नांदेड गुन्हे शाखेचे वरीष्ठ पोलीस निरीक्षक मा. श्री. उदय खंडेराय साहेब यांना ‘लोक संवाद उत्कृष्ट प्रशासकीय अधिकारी पुरस्कार’ जाहीर झाला आहे.
गुन्हेगारी प्रवृत्तीविरोधात सातत्याने कठोर भूमिका घेत, गंभीर गुन्ह्यांचा छडा लावत तसेच नागरिकांच्या सुरक्षेला सर्वोच्च प्राधान्य देत त्यांनी पोलीस प्रशासनात आपला वेगळा ठसा उमटवला आहे. त्यांच्या कार्यकाळात गुन्हे उघडकीस आणण्याचे प्रमाण वाढले असून कायदा व सुव्यवस्थेच्या दृष्टीने नांदेड जिल्ह्यात सकारात्मक बदल घडून आले आहेत.
सत्य, साहस आणि शिस्तीचा ध्वज उंचावणारे त्यांचे नेतृत्व गुन्हेगारांसाठी भय निर्माण करणारे, तर सर्वसामान्य जनतेसाठी विश्वासाचे प्रतीक ठरत आहे. त्यांच्या या उल्लेखनीय कार्याची दखल घेत ‘लोक संवाद’च्या वतीने हा मानाचा पुरस्कार प्रदान करण्यात आला आहे.
या सन्मानामुळे पोलीस दलातील अधिकारी व कर्मचाऱ्यांमध्येही नवचैतन्य निर्माण झाले असून, नांदेड जिल्ह्यातील नागरिकांनी मा. उदय खंडेराय साहेब यांचे अभिनंदन करत त्यांच्या पुढील कार्यासाठी शुभेच्छांचा वर्षाव केला आहे.
