नांदेड २९ डिसेंबर (प्रतिनिधी) माधव वाघमारे
नांदेड-वाघाळा शहर महानगरपालिकेच्या वतीने आगामी सार्वत्रिक निवडणूक–२०२५ च्या अनुषंगाने माध्यम प्रतिनिधींना मतदान व मतमोजणी केंद्रांवर प्रवेश देण्यासाठीची प्रवेशिका (पास) प्रक्रिया अधिकृतपणे जाहीर करण्यात आली आहे. ही प्रक्रिया राज्य निवडणूक आयोग, महाराष्ट्र यांच्या ०९ ऑक्टोबर २०२५ रोजीच्या अधिसूचनेनुसार राबवली जाणार असल्याची माहिती महापालिकेच्या माहिती व जनसंपर्क विभागाने दिली आहे.
महापालिकेच्या माहितीनुसार, निवडणूक काळात प्रसारमाध्यमांच्या समन्वयासाठी माहिती व जनसंपर्क कक्षामार्फत कामकाज करण्यात येणार आहे. तथापि, निवडणूक प्रक्रियेतील प्रसारमाध्यम संनियंत्रण व जाहिरात प्रमाणन आदेश–२०२५ लागू असल्याने, महानगरपालिका आयुक्त किंवा त्यांच्या अधिकृत अधिकाऱ्यांच्या मान्यतेनेच माध्यम प्रतिनिधींना मतदान व मतमोजणी केंद्रात प्रवेश दिला जाणार आहे.
प्रवेशिकेबाबतचे निकष स्पष्ट
राज्य शासनाच्या यादीतील ‘अ’ (मोठे), ‘ब’ (मध्यम) आणि ‘क’ (लघु) वर्गातील दैनिक वृत्तपत्रांच्या प्रत्येकी दोन प्रतिनिधींना प्रवेशिका दिली जाईल.
राज्य शासनाच्या यादीतील साप्ताहिक वृत्तपत्राचा एक प्रतिनिधी पात्र ठरेल.
उपग्रह वाहिन्यांचे प्रत्येकी दोन प्रतिनिधी व एक कॅमेरामन यांना प्रवेश दिला जाईल.
भारतीय टपाल खात्याचा परवाना असलेल्या केबल वाहिन्यांच्या एका प्रतिनिधीला व एका कॅमेरामनला प्रवेशिका दिली जाईल.
याउलट, युट्यूब चॅनल, ऑनलाइन वृत्तपत्रे, संकेतस्थळे, सोशल मीडिया हँडल्स आदींना कोणत्याही प्रकारची प्रवेशिका देण्यात येणार नसल्याचे स्पष्ट करण्यात आले आहे.
अर्जासाठी आवश्यक कागदपत्रे
प्रवेशिकेसाठी माध्यम प्रतिनिधींनी संबंधित वृत्तसंस्थेच्या लेटरहेडवरील अर्ज,
दैनिकाचे संपादक/आवृत्ती प्रमुख यांचे शिफारसपत्र,
उपग्रह वाहिन्यांच्या बाबतीत विभागीय प्रतिनिधीचे (ब्युरो चीफ) शिफारसपत्र,
आधार कार्ड, निवडणूक ओळखपत्र व वृत्तसंस्थेची ओळखपत्राची छायांकित प्रत,
तसेच दोन छायाचित्रे सादर करणे बंधनकारक आहे.
अर्ज सादर करण्याचा पत्ता व कालावधी
अर्ज कक्ष क्रमांक ९११, माहिती व जनसंपर्क कक्ष, मुख्य प्रशासकीय इमारत, नांदेड-वाघाळा शहर महानगरपालिका, नांदेड येथे सादर करावेत.
अर्ज स्वीकारण्याची मुदत दि. २९ डिसेंबर २०२५ ते ०८ जानेवारी २०२६ अशी असून, प्रवेशिका वितरण दि. १२ जानेवारी २०२६ ते १४ जानेवारी २०२६ दरम्यान केले जाणार आहे. ठरलेल्या मुदतीनंतर प्राप्त अर्जांचा विचार केला जाणार नसल्याचेही महापालिकेने स्पष्ट केले आहे.
महानगरपालिका आयुक्त तथा निवडणूक अधिकारी डॉ. महेशकुमार डोईफोडे यांच्या स्वाक्षरीने हा आदेश जारी करण्यात आला असून, सर्व पात्र माध्यम प्रतिनिधींनी दिलेल्या अटी व शर्तींचे काटेकोर पालन करूनच अर्ज सादर करावेत, असे आवाहन करण्यात आले आहे.
