नांदेड |९ फेब्रुवारी प्रतिनिधी माधव वाघमारे
नांदेड ग्रामीण पोलिसांनी दरोड्याच्या तयारीत असलेल्या सराईत टोळीवर निर्णायक कारवाई करत चार जणांना अटक केली असून, त्यांच्याकडून सुमारे १ लाख ५३ हजार ६०० रुपयांचा शस्त्रसाठा जप्त करण्यात आला आहे. ही कारवाई ९ फेब्रुवारी २०२६ रोजी पहाटेच्या सुमारास पांगर शिवारा, नांदेड ग्रामीण हद्दीत करण्यात आली.
गोपनीय माहितीच्या आधारे नांदेड ग्रामीण पोलीस ठाण्याचे अधिकारी व अंमलदारांनी सापळा रचत दरोड्याच्या तयारीत जमलेल्या टोळीवर धाड टाकली. पोलिसांना पाहताच संशयित पळून जाण्याचा प्रयत्न करीत असताना त्यांना पाठलाग करून पकडण्यात आले. या कारवाईत चार इसमांना ताब्यात घेण्यात आले असून, अन्य आरोपींचा शोध सुरू आहे.
पोलिसांनी आरोपींकडून लोखंडी रिव्हॉल्वरसारखी पिस्तूल, एक मॅगझिन, दोन जिवंत काडतुसे, लोखंडी चाकू, लोखंडी पंच, मिरची पूड, मोबाईल फोन असा मोठा मुद्देमाल जप्त केला आहे. जप्त मुद्देमालाची एकूण किंमत अंदाजे ₹१,५३,६००/- इतकी आहे.
या प्रकरणी नांदेड ग्रामीण पोलीस ठाण्यात गु.र.नं. 114/2026 अन्वये भारतीय न्याय संहिता 2023 तसेच शस्त्र अधिनियमाच्या संबंधित कलमांखाली गुन्हा दाखल करण्यात आला आहे. सर्व आरोपींविरुद्ध पुढील तपास सुरू असून, दरोड्याच्या इतर कटांचा उलगडा होण्याची शक्यता पोलिसांनी व्यक्त केली आहे.
ही यशस्वी कारवाई पोलीस अधीक्षक मा. श्री. अबिनाश कुमार, अपर पोलीस अधीक्षक, तसेच उपविभागीय पोलीस अधिकारी इतवारा यांच्या मार्गदर्शनाखाली करण्यात आली. उत्कृष्ट कामगिरीबद्दल संबंधित पोलीस अधिकारी व पो नि ओमकांत चिंचोलकर यांच्या व अंमलदारांचे वरिष्ठांकडून अभिनंदन करण्यात आले आहे.
नांदेड ग्रामीण पोलिसांच्या या धडक कारवाईमुळे परिसरात दहशत निर्माण करणाऱ्या दरोडेखोर टोळ्यांना मोठा धक्का बसला असून, नागरिकांनी समाधान व्यक्त केले आहे.
