प्रतिनिधी, माधव वाघमारे
नांदेड, दि. २ मार्च – नांदेड शहरात सार्वजनिक ठिकाणी दारू पिऊन शांतता भंग करणाऱ्यांवर पोलिसांनी मोठी कारवाई केली आहे. पोलीस अधीक्षक अबिनाश कुमार यांच्या मार्गदर्शनाखाली स्थापन करण्यात आलेल्या सिटी स्ट्रिट सेफ्टी पथकाने रविवारी (दि. १ मार्च) शहराच्या विविध भागात छापे टाकून एकूण ११ जणांवर कारवाई केली.
पोलीस अधीक्षक कार्यालयाने दिलेल्या माहितीनुसार, एम.आय.डी.सी. परिसरात पथकाने केलेल्या पेट्रोलिंग दरम्यान सहा जण दारू पिऊन गोंधळ घालताना आढळून आले. या सर्वांवर महाराष्ट्र पोलीस कायद्याच्या कलम ११०/११७ अन्वये कारवाई करण्यात आली.
भाग्यनगर परिसरात पेट्रोलपंप तुलसी पेंट जवळ दोन इसम दारूच्या नशेत शांतता भंग करीत असताना पकडण्यात आले. यावेळी तपासणीदरम्यान दोन अल्पवयीन मुलांकडे खंजर आढळून आल्याने त्यांच्यावर भारतीय न्याय संहितेअंतर्गत गुन्हा दाखल करण्यात आला आहे.
दामिनी पथकाने अशोकनगर भागात केलेल्या कारवाईत तीन जणांना आरडाओरड करून शांतता भंग केल्याप्रकरणी शिवाजीनगर पोलीस ठाण्यात हजर केले असून त्यांच्यावरही संबंधित कलमांखाली गुन्हे दाखल करण्यात आले आहेत.
याशिवाय पथकाने शहरातील विविध भागांतील दारू दुकाने, वाईन शॉप आणि हॉटेल्सची देखील तपासणी केली.
पोलीस अधीक्षक अबिनाश कुमार यांनी नागरिकांना आवाहन केले आहे की, कोणीही सार्वजनिक ठिकाणी दारू पिऊ नये किंवा दारू पिणाऱ्यासाठी जागा उपलब्ध करून देऊ नये. शांततेचा भंग करणाऱ्या कोणत्याही व्यक्तीवर कडक कारवाई करण्यात येईल, असा इशाराही त्यांनी दिला आहे.
पथक प्रमुख सपोनि भागवत नागरगोजे यांच्या नेतृत्वाखाली ही कारवाई करण्यात आली.
