प्रतिनिधी: माधव वाघमारे
नांदेड, दि. ५ मार्च शहरातील सार्वजनिक ठिकाणी दारूच्या नशेत गोंधळ घालणाऱ्या आणि शांतता भंग करणाऱ्या इसमांवर पोलिसांनी मोठी कारवाई केली आहे. पोलीस अधीक्षक अबिनाश कुमार यांच्या आदेशाने स्थापन करण्यात आलेल्या ‘सिटी स्ट्रिट सेफ्टी पथका’ने काल दिनांक ४ मार्च रोजी वेगवेगळ्या भागात धाडसत्र राबवून एकूण ८ जणांवर कारवाई केली.
पोलीस अधीक्षक अबिनाश कुमार आणि अपर पोलीस अधीक्षक सुरज गुरव यांच्या मार्गदर्शनाखाली पथक प्रमुख सपोनि भागवत नागरगोजे आणि त्यांच्या पथकाने ही मोहीम राबवली. या कारवाईचा तपशील खालीलप्रमाणे आहे:
· नांदेड ग्रामीण भागात (एमआयडीसी, भीमवाडी): पथक क्रमांक दोन आणि तीनमधील पोलिसांना गस्त घालत असताना भीमवाडी एमआयडीसी परिसरात ७ इसम दारू पिऊन सार्वजनिक शांतता भंग करताना आढळून आले. या सर्वांवर महाराष्ट्र पोलीस कायद्याच्या कलम ११०/११७ अन्वये कारवाई करण्यात आली. याशिवाय परिसरातील दारूची दुकाने, वाईन शॉप आणि हॉटेल्सचीही तपासणी करण्यात आली.
· भाग्यनगर (शेतकरी पुतळा रोड): पथक क्रमांक दोनमधील पोलिसांनी शेतकरी पुतळा रोडवर एका इसमाला ‘फटाका बुलेट’ वाहन चालवताना पकडले. त्याच्यावर मोटर वाहन कायद्यान्वये १००० रुपयांचा दंड आकारण्यात आला. येथील हद्दीतील दारूचे दुकाने, वाईन शॉप आणि हॉटेल्सचीही तपासणी करण्यात आली.
· दामिनी पथक (श्यामनगर): दामिनी पथकातील अधिकाऱ्यांनी गस्त घालताना श्यामनगर येथे एक इसम आरडाओरड करून सार्वजनिक शांतता भंग करत असल्याचे आढळून आले. त्याच्यावर विमानतळ पोलीस ठाण्याच्या हद्दीत महाराष्ट्र पोलीस कायद्याच्या कलम ११०/११७ अन्वये कारवाई करण्यात आली.
पोलीस अधीक्षक अबिनाश कुमार यांनी नागरिकांना आवाहन केले आहे की, सार्वजनिक ठिकाणी दारू पिणे तसेच दारू पिणाऱ्यांसाठी जागा उपलब्ध करून देणे हे कायदेशीर गुन्हा आहे. अशा प्रकारे शांतता भंग करणाऱ्या कोणत्याही इसमावर कडक कारवाई करण्यात येईल, असे त्यांनी स्पष्ट केले. ही कारवाई नांदेड शहरातील गुन्हेगारीला आळा घालण्यासाठी सुरू असलेल्या मोहिमेचा एक भाग आहे.
